Продюсер Баян Алагөзованың күйеуі , кәсіпкер Тұрсынғали Алагөзов "Қайрат" футбол клубына тосынсый жасап, екі автобус тарту етті.

Бұл туралы Caravan.kz медиа порталы Massaget.kz-ке сілтеме жасап хабарлайды.

Баян Алагөзова бұл туралы әлеуметтік желідегі парақшасында жариялады.

«Көлік беремін деп еді, бірден автобус тарту етті. Алға, Қайрат! Жеңістеріңе сенеміз!» — деп жазды ол.

Кәсіпкер клуб қожайыны Қайрат Боранбаевпен алдын ала келісіп, командаға нақты қандай көмек керегін сұраған.

«Сіздердің еңбектеріңіз — нағыз ерлік. Баршаңызға үлкен алғыс айтамын», — деді Алагөзов.

Автобустарды табыстау рәсімінен кейін клуб өкілдері кәсіпкерге ризашылық білдіріп, оған «Қайрат» командасының жейдесін сыйға тартты.

Желі қолданушылары кәсіпкердің жомарттығына тәнті болып, пікір қалдырып жатыр.

«Ешкімге міндетті емес еді, бірақ уәдесінде тұрды», «Нағыз азамат! Жарайсыз!», «Осындай жомарт жандар көп болсын», — жылы лебіздер жазылды.

Айта кетейік, бұған дейін Тұрсынғали Алагөзов «Қайрат» «Реал Мадридті» жеңсе, әр ойыншыға автокөлік сыйлайтынын мәлімдеген болатын.