62 млрд теңгеден астам соманы құрайтын 11 жоба экономиканы әртараптандыруға бағытталып отыр.

Премьер-министрдің орынбасары – ұлттық экономика министрі Серік Жұманғарин Торғай өңірінің әлеуметтік-экономикалық дамуына арналған перспективалық жобаларды талқылауға арналған жиын өткізді, деп жазады inbusiness.kz сайты.

Экономиканы әртараптандыруға бағытталған жобалардың арасында "Орталық-Батыс" автожолын салу, Арқалық әуежайын қалпына келтіру секілді жоспар бар. Жоба аясында 400 жұмыс орны ашылады.

Ауыл шаруашылығы секторында "Arkalyq Qus" зауыт қуатын екі есеге кеңейтуді, құрама жем мен органикалық тыңайтқыш өндіру кешендерін салу көзделген.

"Ұрпақ Агро" 10 мың басқа дейін ұсақ мал сатып алуды және етті мал шаруашылығын дамытуға күш салуды ұсынды. "Zengi Group" 20 шағын фермадан тұратын пилоттық жобаны іске қосып, оған шамамен 1,1 млрд теңге қаржы тартуға дайын екенін жеткізді.

Жол бойындағы сервисті дамыту да қаралды: Астана-Ырғыз бағытында қосымша жанармай құю кешендерін салу қажеттігі айтылып, PetroRetail Keruen Inn форматындағы жол бойындағы қызмет көрсету нысандарын енгізуді ұсынды.

Жиынды қорытындылай келе, Серік Жұманғарин барлық айтылған ұсынысты ескере отырып, жоспар жобасын пысықтауды және мәдениет, туризм, халықты жұмыспен қамту салаларын дамыту шараларын қарауды тапсырды. Өнеркәсіп және құрылыс министрлігі әкімдікпен бірлесіп, Арқалық, Амангелді және Жангелді ауданында жер қойнауын геологиялық зерттеуді жүргізуі тиіс. Бұл инвестиция тарту және бизнесті дамыту үшін жаңа мүмкіндік.

– Негізгі жобаларды анықтау, қаржыландыру үшін арнайы шарт жасау маңызды. Ұлттық экономика министрлігі өңірдің орнықты және кешенді дамуының драйвері болатын “Өрлеу-Торғай” жеке бағдарламасын бекітеді, – деп атап өтті вице-премьер.

Серік Жұманғарин жоспар жобасын пысықтауды, мәдениет пен туризмді дамыту және жұмыспен қамту шараларын қарауды, сондай-ақ Арқалық, Амангелді және Жангелді аудандарында жер қойнауын геологиялық зерттеуді бастау тапсырмаларын берді.