ҚМДБ өкілі Елбек Қожамұратовтың айтуынша, қайтыс болған адамның ағзасын басқа адамға салу шариғатқа қайшы емес және аманатқа қиянат болып саналмайды.

Қазақстан мұсылмандары діни басқармасының (ҚМДБ) шариғат және пәтуа бөлімінің маманы Елбек Қожамұратов Орталық коммуникациялар қызметінде өткен дөңгелек үстелде ағза донорлығына қатысты шариғат ұстанымдарын түсіндірді, деп жазады inbusiness.kz сайты.

Оның айтуынша, кей адамдар ағза донорлығына қарсы пікірлерін "адамның денесі – аманат, оны сол күйінде қайтару керек" деген түсінікпен байланыстырады. Алайда шариғат мұндай жағдайда өзгеше ұстаным ұстанады.

– Исламда салауатты өмір сүру – парыз. Адамның денесі мен ағзасы – Алланың аманаты. Бірақ шариғат рұқсат еткен істер аманатқа қиянат болып саналмайды. Сол себепті тірі адамнан тірі адамға немесе қайтыс болған адамның ағзасын басқа адамның өмірін құтқару үшін пайдалану – дінге қайшы емес. Бұл аманатқа қиянат емес, – деді дін өкілі.

Елбек Қожамұратовтың айтуынша, ҚМДБ жанындағы Ғұламалар кеңесі бұл мәселе бойынша бірнеше жыл бұрын арнайы пәтуа қабылдаған.

– Бұл – діни тұрғыда ресми құжат. Пәтуада әлемнің беделді ислам орталықтарының тәжірибесі мен ғалымдардың пікірі ескерілген. Онда "белгілі шарттармен тірі адамнан тірі адамға да, қайтыс болған адамнан тірі адамға да ағза ауыстыруға болады" деп көрсетілген. Бұл шешім Құран мен сүннетке және ғұламалардың тұжырымдарына сүйенеді. Сондықтан діни тұрғыдан ағза донорлығына қарсылық болмауы тиіс. Дегенмен кей адамдардың жеке нанымдары мен психологиялық дайын еместігі кедергі келтіруі мүмкін, – деді ол.