Әлеуметтік желілерде Алматыдағы автобуста болған оқиғаның видеосы тарады, — деп хабарлайды Massaget.kz тілшісі.

Оқиға қалай болған?

Желіде тараған кадрларға қарағанда, белгісіз ер адам автобусқа жүргізуші жағынан келіп, оны сыртқа шығуға шақырған. Ол жүргізушіні балағаттап, автобус терезесін жұдырығымен ұрған. Бұл оқиғаны автобустағы жолаушы әйел видеоға түсіріп алған. Бір мезетте оқиға орнына патрульдік полиция экипажы келгені байқалады.

Видеода "жеңіл көлік жүргізушісі №120 автобустың қозғалысына кедергі келтіріп, қауіпті әрекет жасағаны, кейін автобусқа жақындап, жүргізушіге шабуыл жасағаны және пышақ алып шыққаны" айтылған.

Полиция пікірі

Алматы ПД баспасөз қызметі мәліметінше, оқиға 16 қыркүйекте таңғы сағат 09:00 шамасында болған.

"Автобус жүргізушісі мен жеңіл көлік жүргізушісі арасында жолдағы жағдайға байланысты жанжал шыққаны анықталды. Жеңіл көлік жүргізушісі көлік қозғалысына кедергі келтіргені, ұсақ бұзақылық жасағаны үшін әкімшілік жауапкершілікке тартылды", – деп жазылған хабарламада.

Аптаның басты оқиғалары мен пайдалы видеоларды көру үшін YouTube арнамызға жазылыңыз