Ұлытау облысында жыл соңына дейін 200-ге жуық жас кәсіпкер мемлекет қолдауына ие болады. Грант түрінде ұсынылған қайтарымсыз қаржыны кәсіп иелері бизнесін кеңейтуге және қосымша құрал-жабдық сатып алуға жұмсай алады. Қазір өңірде түрлі стартап жобаларға берілетін грант саны мен қаржы көлемі ұлғайды.

Кәсіп бастауға ниетті жастарға қаржының жоқтығы қолбайлау болып жатады. Бұл ретте «Тәуелсіздік жастары» атауымен берілетін әкім гранты болашақ кәсіпкерлерге үлкен қолдау. Мысалы Сәтбаев қаласында былтыр 11 жас кәсіпкер осының нәтижесінде бизнес бастаған. Дәстүрлі грантқа биыл тағы 40-тан астам адам өтініш беріп отыр.

Амангелді Құрақбай, Сәтбаев қалалық Ішкі саясат бөлімінің басшысы:

- Жастардың стартАп жобаларын қолдау өзінің тиімділігін көрсетті. Барлық жоба сәтті жұмыс жасап жатыр және жандарына 1-2 адамды қосымша қабылдаған. Биыл да ол жоба өзінің жалғасын тауып жатыр. бұл бағытқа 30 млн теңге қаражат бөлінді. Айта кету керек жыл сайын бөлініп жатқан қаражаттың көлемі де артып келе жатыр.

Мемлекет ұсынған қайтарымсыз қаржыға кәсіп ашқандардың бірі – Айман Ақпанбетова. Бүлдіршіндерге кәсіби бағдар беретін орталыққа сұраныс жоғары. Мұнда балаларды ойын арқылы дәрігер, суретші, аспаз мамандықтарына баулиды.

Айман Ақпанбетова, жас кәсіпкер:

- 3,5 млн теңге мемлекет тарапынан қолдау алған болатынмын. қазіргі таңда қаншама жастарға жаңа бағыт, жаңа идеяларды іске асыруға арналған бағдарлама болды. соның арқасында ойын-сауық орталығын ашып отырмын. орталықтың басты ерекшелігі балаларымыздың бос уақытын тиімді пайдаланып қана қоймай, оларға әртүрлі мамандық иесі болуды үйретеміз.

Қайтарымыз гранттар жас кәсіпкерлерден бөлек, әлеуметтік бағытта жұмыс істейтін кәсіп иелеріне де беріледі. Мәселен, жезқазғандық Бекзат Кәрімов осыдан 3 жыл бұрын дәрігерлік көмек көрсететін шағын клиника ашқан. Биыл әлеуметтік грант алып, кәсібін кеңейтті.

Бекзат Кәрімов, кәсіпкер:

- 5 млн грант алдым. Сол 5 млн-ға холтер және смарт аппарат алдым. Холтер аппарат жүректі 24 сағат тексереді, нақты диагноз қояды. +Жезқазғанда жеткіліксіз дәрігерлердің қызметін осы жерге алдырып, халықтың жағдайын жасап, жоқ дәрігерлерді алдыруға әрекет жасап жатырмыз.

Мемлекет қолдауын тиімді пайдаланудың нәтижесінде өңірде бизнеске бет бұрғандардың саны артты. Қазір облыстағы әрбір бесінші тұрғын осы салада еңбек етеді. Негізгі капиталға салынған инвестицияның жартысынан астамы шағын және орта бизнеске тиесілі. Олар жыл басынан бері 72 млрд теңгенің өнімін өндірген.

Данияр Арынғазин, Кәсіпкерлік және өнеркәсіп басқармасының басшысы:

- Тәуелсіз іскерлік климат рейтингісінің нәтижесіне сәйкес облысымыз республикамыз бйоынша шағын кәсіпкерліктің даму деңгейінен бірінші орынға ие болды. Ал орта бизнестің даму деңгейінен 24-жылы 15-ші орында болатын болсақ, 25-жылы бірінші тоқсанда 8-ші орынға көтерілді.

Аймақта бизнестің дамуына сонымен қатар жеңілдетілген несиелендіру бағдарламасы да айтарлықтай серпін беріп отырғанын айтады мамандар. Былтыр өңірдегі 470 кәсіпкерлік нысан жалпы сомасы 17 млрд теңгеден астам жеңілдетілген несие алған.

Авторлары: Елдос Кәкенов, Елизавета Шалина, Нурбол Уздикбаев