Ұлыбританияда Лейбористік партия мүшелері мен палестиналықтарды қолдаушы белсенділер елге ресми сапармен келетін Израиль президентін тұтқындауды талап етуде.
Олар Исаак Герцогты Газа секторындағы көптеген кісі өліміне қатысы бар деп айыптайды.
«Израиль премьер-министрі Биньямин Нетаньяху Ұлыбританияға келген жағдайда ол дереу қамауға алынады», — деп Даунинг-стрит хабарлаған еді. Өйткені халықаралық қылмыстық сот оның қолына кісен салуға бұйрық шығарды. Ал Израиль президенті Герцог Нетаньяху мүшелік етпейтін басқа партиядан емес пе? Оның Лондонға келуіне не кедергі?
Израиль президенті билік партиясы мүшелерінің наразылығына қарамастан бүгін Лондонға келуді жоспарлаған. Лейбористер премьер-министр Кер Стармерге Исаак Герцогпен және оның делегациясымен кездеспеуге шақырды. Израиль президентінің сапары британ министрлерінің жұмысына да қиындық тудыруы мүмкін. Себебі британ үкіметі жақында Біріккен Ұлттар ұйымы Бас Ассамблеясында Палестинаны мойындау мәселесін көтергелі жатыр. Айта кету керек, министрлер кабинеті Герцог пен Стармердің кездесетінін ресми түрде растамады. Стармердің бұған дейін шетелдік жоғары лауазымды тұлғалармен кездесуден соңғы сәтте бас тартқан кездері болған. Лейбористік партия мүшелері кез келген келіссөз Газадағы соғысқа қатысты Ұлыбританияның позициясын теріске шығарып, бұлыңғыр ете түседі деп отыр.
Исаак Герцог басқа саяси партиядан және көбіне ол символдық рөл ғана атқарады. Бұрын оның демократия және сот реформалары мәселелері бойынша Нетаньяхумен келіспеушіліктері де болған. Бірақ жалпы алғанда ол Газа секторындағы әскери әрекеттерді қолдаған. Израиль президентінің ерекше назар аудартқан бір мәлімдемесі бар. Ол 2023 жылғы 7 қазандағы ХАМАС шабуылдары үшін Газа секторындағы барлық палестиналық жауапты деп айтқан еді. Сондықтан Лейбористік партия мүшелері мен Палестинаны қолдаушы белсенділер бұған дейін де Израиль президентін әскери қылмыстары үшін тұтқындауды сұрады. Байқап тұрғандарыңыздай, премьер-министр резиденциясының жанында олар қазір ту ұстап, Герцогті дереу қамауға алуды талап етуде.
