Бұл туралы BBC агенттігі жазды.

Ливанда Израильдің әуе шабуылы салдарынан 39 адам қаза тапты. Бұған жауап ретінде Хезболла Израильдің солтүстігіне және Ливанның оңтүстігіндегі израиль әскерлеріне зымырандар мен ұшқышсыз аппараттар жіберген, деп хабарлайды inbusiness.kz сайты BBC-ге сілтеме жасап.

Израильдің әуе соққыларының басым бөлігі Ливанның оңтүстігіне бағытталған. Тель-Авив бұл шабуылдардың Иран қолдайтын қарулы топпен байланысы бар инфрақұрылым мен тұлғаларға жасалып жатқанын мәлімдеген.

Израиль мен Хезболла арасындағы өзара соққылар АҚШ президенті Дональд Трамп 16 сәуірде Израиль мен Ливан үкіметтері арасында атысты тоқтату туралы келісім жариялағаннан бері жалғасып келеді. Екі тарап бір-бірін бітімді бұзды деп айыптап, шабуылдарын тоқтатпаған.

Ливан Денсаулық сақтау министрлігінің мәліметінше, ең ауыр соққылардың бірі елдің оңтүстігіндегі Сайда қаласы маңындағы Айн-эд-Дельб ауданында болған. Ол жерде тұрғын үйлер қирап, ондаған адам үйінді астында қалған. Израиль мен Хезболла арасындағы әскери шиеленіс басталғалы бері Ливанда 2 795 адам қаза тапқаны айтылды.

Хезболла қарымта жауап ретінде Израильдің солтүстігіне дрон арқылы соққы жасаған. Израиль әскері бұл шабуыл нәтижесінде үш сарбаздың жараланғанын хабарлады.

Ливан Денсаулық сақтау министрлігінің дерегінше, соңғы бір апта ішінде Израильдің ел аумағына жасаған шабуылдарынан 120-дан астам адам қаза тапты, олардың ішінде әйелдер мен балалар да бар.