Ақ үй басшысының Truth Social желісіндегі парақшасында жазба пайда болды .
АҚШ президенті Дональд Трамп Израильдің Қатарға жасаған шабуылына қатысты тың мәлімдеме жасады, деп хабарлайды inbusiness.kz сайты.
Трамп Тель-Авивтің Доха маңында орналасқан ХАМАС-ты нысанаға алғаны туралы ақпарат алған.
"Бұл шешімді мен емес, премьер-министр Нетаньяху қабылдады. Егеменді мемлекет әрі АҚШ-тың жақын одақтасы Қатар аумағын біржақты бомбалау әрекеттері Израиль мен Американың мақсаттарына сай келмейді", – деп жазды Трамп Truth Social желісінде.
Кейін Трамп Қатар билігін шабуыл туралы ескертуге бұйрық берген.
"Мен бірден арнайы өкіл Стив Уиткоффқа Қатарға шабуыл болатынын ескертуге тапсырма бердім. Ол бұл тапсырманы орындады, алайда, өкінішке қарай, соққыны тоқтатуға тым кеш болды. Мен Қатарды АҚШ-тың мықты одақтасы әрі досы деп есептеймін, бұл шабуылдың болғанына өкініш білдіремін. Мен барлық тұтқынның босатылып, қаза тапқандардың мәйіті қайтарылғанын, бұл соғыстың аяқталғанын қалаймын", – деп жазды Дональд Трамп.
Айта кету керек, бұған дейін Қасым-Жомарт Тоқаев Қатарда Израиль жасаған әскери акцияны айыптағанын жазған болатынбыз.
