Бұл көлік құралдарының қызметін нақты реттеу үшін түзетулер әзірленді.

Пилотсыз көліктер арқылы жүк тасымалын ұйымдастыру үшін "smart" жолдарды салу мүмкіндігі қарастырылуда. Бұл туралы Көлік вице-министрі Мақсат Қалиақпаров Үкімет отырысында айтты, деп хабарлайды inbusiness.kz сайты.

"Пилотсыз көлік құралдары – ғылым мен техниканы дамытудың жоғары перспективалы бағыттарының бірі. Алайда пилотсыз көлік құралдарын пайдалану бойынша құқықтық шеңбер осы уақытқа дейін нақты айқындалмаған. Пилотсыз құралдардың қызметін одан әрі нысаналы реттеудің негізін қалыптастыру мақсатында министрлік қолданыстағы заңнамалық актілерге түзетулер әзірледі. Осы кезеңде негізгі ұғымдар мен уәкілетті органдардың құзыреттері көзделген. Түзетулер алдын ала барлық мемлекеттік органдармен келісілді. Осы жылдың аяғына дейін қабылдаймыз", – деді вице-министр.

Мақсат Қалиақпаров пилотсыз көліктерді қолдану тиісті инфрақұрылымның болуын талап ететінін жеткізді. Осыған байланысты пилотсыз көліктер арқылы жүк тасымалын ұйымдастыру үшін "smart" жолдарды салу мүмкіндігі қарастырылып жатыр.

Қазіргі пилотсыз жүк тасымалдарын Қазақстан – Қытай шекарасында қолдану бойынша жұмыс атқарылып жатыр, деп атап өтті Көлік вице-министрі Мақсат Қалиақпаров.

"Пилотсыз көлікті айтатын болсақ, біздің Астанадағы LRT пилотсыз болады ғой? Бұл – бірінші мысал. Әрі қарай бұл тәжірибені кеңейту керек", – деді Премьер-Министр Олжас Бектенов.