Бүгінде автономды көліктерді іске қосуға арналған инфрақұрылым дайындалып жатыр.

2026 жылдың екінші жартысында жүргізушісіз такси пилоттық жобасын қолданысқа енгізу жоспарланған, деп хабарлайды inbusiness.kz сайты.

Цифрлық даму министрлігі мұны серіктес компаниялармен бірлесіп "реттеушілік құмсалғыш" аясында жүзеге асырмақ. Бұл технологияны сынақтан өткізуге және соның негізінде заңнамалық базаны қалыптастыруға мүмкіндік сыйлайды.

Серіктестер қазіргі уақытта көлікжайлар дайындап, автопаркті орнатып, бағдарламаны Қазақстанның жол жүру ережелеріне және жергілікті жол жағдайларына бейімдеп жатқан көрінеді. Қозғалыс оператордың толық бақылауында болады.

Жоба тек инфрақұрылымның дайын екені расталғанда, сынақтар оң нәтиже бергеннен соң ғана іске қосылады. Жасанды интеллект және цифрлық даму министрлігі қауіпсіздіктің бірінші орында болатынын айтты.

Бұл ретте Қазақстан да әлемдік тәжірибелерге сүйенеді: Tesla және Waymo (АҚШ-та), сондай-ақ Baidu мен Pony.ai (Қытайда) жобаларында коммерциялық іске қосуға дейін ұзақ жылдар бойы сынақтар жүргізіліп, реттеу жүйелері бейімделген.

Министр Жаслан Мәдиевтің айтуынша, елімізде пилотсыз технологияларды дамытуға ерекше көңіл бөлінуде.

– Қазақстанда халықаралық технологиялық компаниялардың қатысуымен жүргізушісіз көліктердің пилоттық жобасын іске қосу жоспарланып отыр. Жоба 2026 жылдың екінші тоқсанында жүзеге асырылады, – деп қоса кетті Жаслан Мәдиев.