Абай облысындағы түзету мекемелерінің бірінде жазасын өтеп жатқан 53 жастағы азамат алғаш рет мектеп партасына отырды. Ол сауатын ашып, білім алуды осы жаста ғана қолға алмақ, деп хабарлайды Skifnews.kz ақпарат порталы.

Айтуынша, ата-анасы ішімдікке салынып кеткендіктен, ол бала кезінен екі қарындасын бағып, ерте еңбекке араласқан. Өкінішке қарай, мектепке баруға мүмкіндігі болмай, жастық шағы түрлі қамау орындарында өткен.

Polisia.kz дерегінше, қазір бұл түзету мекемесінде №2 жалпы білім беретін орта мектептің қолдауымен 21-53 жас аралығындағы сотталғандар оқу мүмкіндігіне ие. Солардың ішінде алғаш рет партаға отырған 53 жастағы азаматтың тағдыры ерекше назар аудартты.

"Балалық шағым еңбекпен өтті, қарындастарымды бағуға тура келді. Әке-шешем ішімдікке беріліп кеткендіктен, мектепке апарған да жоқ. Жастық шағымның көбі түрмелерде өтті. Қазір ойланып қарасам, білім алғанда тағдырым мүлде басқа болар еді. Бірақ “ештен кеш жақсы” дейді ғой", – деп бөлісті ол.

Ал қамау мекемесінің басшысы Жеңісбек Дәуренбековтың айтуынша, білім – сотталғандарға түрмеден шыққаннан кейін жаңа өмір бастауға жол ашатын үлкен мүмкіндік.м