Мемлекет басшысы Конституциялық реформаның ел дамуына қосқан серпінін атап өтті.

Қабылданған өзгерістер саясатта, экономикада, әлеуметтік салада және сот жүйесінде "Әділетті мемлекет" қағидатын жүзеге асыруға мүмкіндік берді, деп жазады inbusiness.kz сайты.

Конституцияда жер мен табиғи ресурстардың халық игілігіне тиесілі екені нақты жазылған. Бұл қағидатты іске асыру үшін "Ұлттық қор – балаларға" бағдарламасы қолға алынып, былтырдан бері балалардың есепшотына 1,5 миллиард доллардан астам қаржы аударылды.

Соңғы жылдары қабылданған заңдар да елдегі құқықтық тәртіпті күшейтуге бағытталды. Адам саудасына қарсы іс-қимыл шаралары күшейтілді, тұрмыстық зорлық-зомбылық пен некеге мәжбүрлеуге қатаң жаза енгізілді. Қылмыстық сот жүйесі ізгілендіріліп, тиісті кодекстерге ауқымды түзетулер жасалды. Конституцияның мерейтойына орай қабылданған Рақымшылық туралы заң да мемлекет саясатының адамгершілік қағидаттарын айқындайды.

Президент Конституцияның адам құқығының берік тірегі болып қалуы қажет екенін ерекше атап өтті. Заң үстемдігі – әділетті қоғам құрудың басты шарты. Сондықтан әр азамат заңды құрметтеп, оны қатаң сақтауға тиіс.

Мемлекет басшысы заңгерлер қауымдастығын Конституция қағидаларын кеңінен түсіндіруге шақырып, Ата заңды құрметтеу мен құқықтық мәдениетті нығайтудың ел болашағы үшін маңызды екенін жеткізді.