Астанада «Senat Open» турнирінің финалдық кезеңі басталды. Әуесқой шахматшылардың басын біріктіретін шараны Сенат Төрағасы Мәулен Әшімбаев ашты.

Жарысқа ел аумағы бойынша іріктелген 3000-нан астам әуесқой шахматшы қатысты. Турнир өңірлерде екі кезеңнен өтті. Ал финалға 215 қатысушы жолдама алды. Сенат төрағасы Мәулен Әшімбаев ашылу рәсімінде соңғы жылдары елімізде зияткерлік спорт түрін дамытуға ерекше көңіл бөлінгеніне тоқталды. Сондай-ақ шахматты дәріптеуге, кәсіби және әуесқой деңгейде дамытуға тиісті жағдай жасалып жатқанын атап өтті. Осы мақсатта биыл мектеп бағдарламасына «Шахмат негіздері» пәні енгізілген. Аталған бастама 60 мыңнан астам оқушыны қамтымақ.

Мәулен Әшімбаев, Сенат төрағасы:

Мемлекет басшысы Қасым-Жомарт Кемелұлы Тоқаевтың бастамасымен шахматты дәріптеуге үлкен мән беріп келеді. Соның аясында 2027 жылға дейін кешенді жоспар қабылданды. Басқа да ауқымды жұмыстары жүйелі түрде жүргізіліп келеді. Парламент Сенаты мен Қазақстан Шахмат Федерациясы бірлесіп ұйымдастырған осы турнирде сол бағытта жасалып жатқан маңызды қадамдардың бірі. «Senat Open» сайысы осымен екінші жыл қатарынан өткізіліп отыр. Алдағы уақытта да бұл бастама ары қарай дамып, игі дәстүрге айналады деп сенеміз.

Айдана Қуантхан