Биыл Ақтөбе шаһарының қала болып құрылғанына 156 жыл толды. Қала күні 28 мамырда аталып өтеді. Қала күнінің құрметіне бүгін Астана саябағының алаңында этнофестиваль өтті, деп хабарлайды Zakon.kz.

Оған облысымыздың түкпір-түкпірінен шеберлер, зергерлер, суретшілер, өнер адамдары, тары-талқан жасаушы әжелер, садақ атушылар, ұлттық аспап жасаушылар, қолөнершілер қатысты.

Астана паркі бірнеше алаңға бөлінді. Алаңдарда өтіп жатқан шараларды қала әкімі Азамат Бекет тұрғындармен бірге аралап көрді.

"Тоқыма пати" алаңында 156 әженің қатысуымен ұршық иіру, жүн түту, киіз басудан шеберлік сағаттары және жіптен тоқылған өнімдердің көрмесі ұйымдастырылды. Оған "Дәстүрге жол" қоғамдық ұйымының, "Әжелер ансамбльінің" мүшелері қатысты.

"Зергерлер алаңында" қазақтың ұлттық әшекей бұйымдарының көрмесі және зергерлердің шеберлік сағаты өтті. "Геолог" Мәдениет үйіндегі "Шолпы" қыздар клубының қатысушылары шаш өрудің түрлерін көрсетіп, оған 156 бұрымды қыз қатысты. Ең шашы ұзын қызға "Бұрымды қыз — 2025" кубогі табысталды.

Ал "Ұлттық аспаптар алаңында" қазақтың кең танылмаған ұлттық музыкалық аспаптары насихатталды.

Сондай-ақ қолөнер шеберлері өздеріне бөлінген алаңда қыштан құмыра жасаудан шеберлік сағатын өткізді.

Және де "Ақтөбе қаласының 156 көрнекті жері" атты сурет байқауына қатысқан суретшілер қаламыздың көрікті орындарын, табиғатын қыл қаламмен бейнелеп, қала күніне ерекше сый жасады.

Ал "Тары-fest" гастрофестиваліне қатысушылар облыс аудандарынан келді. Қазақтың тарысы мәдени мұраның бір бөлігі және жергілікті бренд ретінде насихатталды. Ақтөбе облысында ежелден өсірілетін бұл дәстүрлі дақыл Қазақстанның батыс бөлігінің тарихы мен асханасында ерекше орын алады. Фестиваль қонақтары дәстүрлі рецептерден бастап фьюжн стиліндегі авторлық интерпретацияларға дейін тарыдан жасалған 50-ден астам тағамның дәмін татып көрді. Сонымен қатар, шеберлік сағаттары, қолөнер жәрмеңкесі мен дәм тату аймақтары фестивальдің гастрономиялық мазмұнын толықтырып қана қоймай, жергілікті фермерлер мен қолөнершілерге өз өнімдерін ұсынуға мүмкіндік берді.

Ерекше назар тарының жоғары өнімділігі бойынша әлемдік рекорд орнатқан көрнекті агроном Шығанақ Берсиевтің туған өлкесі – Ойыл ауданының қатысуына аударылды. Қонақтар аудандық мұражайдан әкелінген бірегей экспонаттарды тамашалап, тары өсіру тарихымен, оның рухани және мәдени мәнімен танысты. Тарыны өңдеудің дәстүрлі әдістері көрсетіліп, театрландырылған қойылымдар ұсынылды – бұл фестивальді тек дәмді емес, сонымен қатар танымдық шараға айналдырды.