Алматылықтар үшін енді ит пен мысықты қапысыз табудың жолы бар. Ол тегін чиптеу. Қалада үй жануарларын тіркеу бағдарламасы басталды. Қала әкімдігінің мәліметінше, жыл соңына дейін 15 мың жануарға жеке-дара чип енгізілмек.

Мұндағы басты мақсат – үй жануарларын есепке алып, олардың қауіпсіздігін қамтамасыз ету. Жануар адасып кетсе, бір түйір чиптен-ақ иесін табуға болады. Қызмет барша қала тұрғындарына қолжетімді. Оны қаладағы 8 ветеринарлық клиникада жасауға болады.

Қанат Орынханов, ветеринарлық клиника директоры:

- Біз жануарларды шамамен 3 айдан бастап тіркейміз. Себебі 3 айында прививка салынады. Прививка салғаннан кейін паспорт ашылады. Паспорт ашылғаннан кейін тері астына чипті саламыз. Әр чиптің өзінің нөмірі бар. Сол чипті салғаннан кейін паспортқа чиптің нөмірі тіркеледі, ол бекітіледі.