Вашингтондағы соңғы кездесу халықаралық медианың басты назарында.

Әлемдік басылымдар Зеленский мен Трамп арасындағы әңгіменің астарын әр қырынан талдап жатыр. Жаһандық баспасөз не дейді?

The Washington Post: Зеленский Трампқа алғыс білдірді

Америкалық Washington Post басылымы жазғандай, жарты жыл бұрын Ақ үй Украина президенті Владимир Зеленскийді «рахмет айтуға жарамады» деп сынаған болатын. Алайда алты айда жағдай өзгерді: Вашингтондағы соңғы кездесуде Зеленский Еуропа және НАТО көшбасшыларымен бірге Дональд Трампқа бірнеше мәрте алғыс айтты.

The Тimes: Украина президенті кездесуге костюм киіп келді

The Times басылымы кездесудің символдық сәтін атап өтті. Зеленский дәстүрлі әскери киімнің орнына костюм киіп келді. Трамп оны жылы қабылдап, киіміне ишара жасап әзілдесіп, риза кейіп көрсетті. Сарапшылардың пікірінше, бұл екі көшбасшы арасындағы қатынастың жаңа кезеңге өткенін білдіреді.

The New York Times: Tрамптың сөзіне сенуге бола ма?

Ал The New York Times басылымының мәліметінше, кездесуде алғыспен қатар жылы лебіздер де аз айтылмаған. Дегенмен, басты сауал ашық күйінде қалып отыр: Трамптың мәлімдемелері нақты іске аса ма, әлде бұл да уақытша саяси ұстанымның көрінісі болып қала ма? Сарапшылардың ойынша, соғыстың үш жарым жылын өткеріп отырған Украина үшін бұл үлкен тәуекел.

Politico: Трамптың ұстанымы өзгерген

Politico басылымы Трамптың ұстанымындағы өзгерістерге назар аударыпты. Соңғы жарты жыл ішінде ол Украинаға қатысты көзқарасын айтарлықтай өзгерткен. Енді Трамп елдің ұзақ мерзімді қауіпсіздігін нығайтуға және екіжақты келісімдерге атсалысуға дайын екенін білдіруде, деп жазды Politico.

Әйгерім Асылхан, 24 kz