Қазақстанның шығыстағы көршісі Бейжің мен Гуанчжоу қалаларын байланыстыратын үлкен каналдың құрылысына дайындалып жатыр, деп жазады inbusiness.kz сайты.

Жоспардағы Цзянси–Гуандун каналы Қытайдың Янцзы және Чжуцзян өзендерін жалғайтын су арнасы.

Ол солтүстікте Цзюцзян қаласының іргесіндегі Поянху көлінен басталып, Ганьцзян өзенінің арнасы арқылы Наньчан, Цзиань, Ваньань, Ганьчжоу қалаларының аумағынан өтеді.

Ары қарай Таоцзян су айрығын кесіп өтіп, Гуандун провинциясының жеріне кірген соң Чжэньшуй өзенінің бойымен Наньсюн, Шаогуан қалаларын басып өтіп, Гуанчжоу қаласындағы Чжуцзян сағасына қосылады.

Цзянси–Гуандун каналының жалпы ұзындығы – 1 237 шақырым. Ол Гуандун, Цзянси және Чжэцзян провинцияларын байланыстыратын ірі су көлігі жобасының бір бөлігі.

Жоба сәтті аяқталса, аталған үш провинция арқылы өтетін жаңа су жолы әлемге әйгілі Ұлы Қытай каналымен тұтасып, елдегі екі ірі су жүйесі – Янцзы мен Чжуцзян өзендері өзара байланысады.

Нәтижесінде, Қытайды солтүстіктен оңтүстікке қарай көктей өткен жаңа су арнасы пайда болып, Гуанчжоудан Бейжіңге дейінгі су қатынасы іске асырылады.

RFI-дің жазуынша, каналдың жалпы құны 320 миллиард юань (шамамен 44,4 миллиард АҚШ доллары). Бұл жоба Қытай тарихындағы құны ең қымбат жасанды су арнасы болуы мүмкін. Жобаның болжамды шығындары Гонконг–Чжухай–Макао көпірінен үш есе көп.

Чжэцзян– Цзянси–Гуандун су арнасы "Кешенді көлік желісін дамытудың ұлттық жоспары (2021-2035)" мен "Ішкі су көлігі инфрақұрылымын дамыту бағдарламасына" енгізілген. Қазір жобаның техникалық-экономикалық негіздемесі әзірленіп жатыр, ал құрылыс жұмыстары "Он төртінші бесжылдық" аясында басталады деп жоспарланған.

Қытайдың Көлік министрлігінің мәліметінше, каналда 1000 тоннаға дейінгі жүк кемелері еркін жүзе алады. Каналдың жылдық жүк өткізу көлемі шамамен 25 миллион тоннаға жетуге тиіс.

RFI-дің мәліметінше, бұл жоба сондай-ақ Қытай үкіметінің 2035 жылға дейін елдегі ішкі су көлігі желісінің жалпы ұзындығын 25 000 шақырымға жеткізу жөніндегі ауқымды стратегиялық жоспарының бір бөлігі.