Мемлекеттік қызметтер саласында Aitu платформасы ұлттық мессенджер ретінде бекітілмек. Ресми органдардың коммуникациясы осы жүйеге көшіріліп, негізгі қатысушылары бірыңғай цифрлық ортаға біріктіріледі. Бұл ақпарат бүгін Премьер-министр Олжас Бектеновтың төрағалығымен өткен жиында жарияланды. Онда жасанды интеллектіні дамыту жөніндегі Президент тапсырмаларын жүзеге асыру мәселелері талқыланған еді. Үкімет жасанды интеллект технологиясын экономикаға кіріктіруді тездету үшін цифрлық штаб құрды. Әрі «Самұрық-Қазына» қорымен бірлесіп, жол картасын әзірлеуге кіріскені хабарланды. «Президент жүктеген тоғыз міндет «көзге көрінетін экономикалық нәтижемен» осы жылдың желтоқсанына дейін орындалуға тиіс», — деді Премьер-министр Олжас Бектенов жиында.

Данияр Қайыртай