Бұл туралы Денсаулық сақтау министрлігінің МӘМС жүйесін жетілдіру және талдау департаментінің директоры Ләззат Шоманова хабарлады, деп жазады inbusiness .kz сайты.

2026 жылдан бастап міндетті әлеуметтік медициналық сақтандыру (МӘМС) жүйесіне бір миллионнан астам қосымша адам қамтылмақ.

Еске салайық, 2025 жылдың 14 шілдесінде Президент МӘМС туралы заңға енгізілген өзгерістерді мақұлдаған болатын.

Жаңа модель қандай негізде құрылды?
Заң өзгерістері ұзақ мерзімді актуарлық модельге сүйеніп жасалды. Бұл модельде:

• 2018–2025 жылдар аралығындағы халық санының 7%-ға өсуі,

• медициналық көмекке сұраныстың артуы,

• сырқаттану деңгейінің көтерілуі сияқты факторлар ескерілген.

Медициналық көмек пакеттері қалай өзгереді?
2026 жылдан бастап (ішінара 2025 жылдан), халыққа көрсетілетін тегін медициналық көмек (ТМККК) пен МӘМС пакеттері біртіндеп біріктіріледі. Бұл:

• сақтандыру мәртебесіне қарамастан, жиі кездесетін аурулар бойынша базалық көмекпен қамтамасыз етуге,

• қызметтердің қайталануын болдырмауға мүмкіндік береді.

2027 жылдан бастап денсаулық сақтау жүйесін қаржыландыру толық сақтандыру моделіне көшеді.

Жарна жүйесі қалай өзгереді?
2026 жылдың 1 қаңтарынан бастап:

• МӘМС жарнасын есептеу базасының жоғарғы шегі артады;

• Жоғары жалақы алатын қызметкерлерге қатысты жеңілдіктер жойылады. Бұл шамамен жұмыс істейтін азаматтардың 9%-ына әсер етеді.

2027 жылдан бастап мемлекет төлейтін жарналар мөлшерлемесі де біртіндеп артады. 2037 жылға қарай ол 4,7%-ға жетіп, қосымша 2,8 трлн теңге тартылмақ.

Әлеуметтік осал топтарды қамту
Қазіргі таңда халықтың 82,3%-ы (шамамен 16,7 млн адам) сақтандырылған. Оның 72,5%-ы — жеңілдікті санаттағы азаматтар. Алайда 3,3 млн адам МӘМС жүйесіне қатыспайды, оның ішінде:

• 2,4 млн-ы – тұрмыс жағдайы қанағаттанарлық азаматтар,

• 1 млн-ы – табысы төмен, қиын жағдайдағы азаматтар.

Осы табысы төмен азаматтар үшін жарнаны медициналық көмекке жүгінген сәтте жергілікті бюджет есебінен төлеу ұсынылып отыр. Сондай-ақ, ресми жұмыссыздар үшін де жарнаны жергілікті әкімдіктер төлейтін болады.

Осы өзгерістер нәтижесінде 2026 жылы МӘМС жүйесіне тағы бір миллионнан астам азамат қосылады. Бұл – медициналық көмектің қолжетімділігі мен сапасын арттыруға бағытталған маңызды қадам.