Кипрде соңғы 50 жылдағы ең үлкен орман өрті өршіп тұр. Әзірге ел бойынша 120 шаршы шақырым жер өртенді
Бұл туралы Caravan.kz медиа порталы kaz.inform.kz-ке сілтеме жасап хабарлайды.
Өрт сөндірушілердің хабарлауынша, 23 шілдеде өрттен зардап шеккен ауылдың төбелерінің бірінің ішінде 2 адамның мәйіті бар өртенген көлік табылған. Тағы 2 адам ауыр күйік жарақаттарымен Никосия жалпы ауруханасына жеткізілген. Олардың жағдайы ауыр деп бағаланған. Барлығы 10 адам зардап шекті. Сондай-ақ өрт салдарынан ұзындығы 14 шақырым болатын таулы аймақтағы 14 ауылдың тұрғындары эвакуацияланды. Лофу ауылында кемінде 20 үй қирағаны хабарланды.
Үкімет өкілдері белсенді өрттер 24 шілде күні таңертең ауыздықталғанын мәлімдегенімен, содан бері кейбір аймақтарда өрт қайта тұтанған. Атап айтқанда, кеше түс ауа батыстағы Пафос ауданында орман өрті тағы да тіркелді.
Мамандар күндіз екпінді жел мен аптап ыстыққа ұласып, жағдайдың одан да қауіпті болатынын ескертті. Көптеген жол жабық күйде, құтқару жұмыстары тоқтаған жоқ. Өртпен 250-ден астам өрт сөндіруші күресіп жатыр. Сондай-ақ 18 ұшақ әуеден қолдау көрсетеді.
2 күн бұрын басталған орман өрті кем дегенде 120 шаршы шақырым аумақты шарпыған. Бұл жер аумағы аралдың жер көлемінің 1%-дан астамын құрайды. Соңғы ірі өрт 1974 жылы аралды түрік әскерлері басып алған кезде болған. Ол кезде шамамен 260 шаршы шақырым аумақ өртенген.
Шетелдік көмек
Кипр үкіметінің баспасөз хатшысы Константинос Летимбиотис билік басқа елдерден көмек сұрағанын айтты.
– Испания 2 өрт сөндіру ұшағын жіберіп жатыр. Иордания 2 тікұшақпен көмек көрсетуге уәде берді. Ұлыбритания да өртті сөндіруге әскери ұшағын жұмылдырды. Ал, Израиль өз ұшағын жіберетінін хабарлады, — деді баспасөз хатшысы.
