Ақтауда электр қуатының жиі сөнуінен тұрғындардың мазасы қашты.

Бұл жағдай жеделсатылардың істен шығуына және бағдаршамдардың ақауына себеп болған. Мамандардың айтуынша, аптап ыстықтың салдарынан қалалық электр желілеріне шамадан тыс жүктеме түсіп, апаттар жиі тіркеліп жатыр. Жалпы қаладағы желілердің 66 пайыздан астамы тозып кеткен.

Облыс орталығында электр желісінің жалпы ұзындығы 485 шақырымға жуық. Бірақ соның үштен бірі апатты жағдайда. Осының кесірінен ескі шағын аудандар қиындықтарға тап болып отыр.

Бауыржан Нұрбосынов, қала тұрғыны:

- Тоқ жоқ үйде. Үй жанып тұр. Күн ыстық. Балалар үйде, біз таңертең жұмысқа кетеміз, кешке келеміз. Әлі тоқ жоқ. Лифт істемейді. Мен сегінші этажда тұрамын.

Эмилия Тахмасова, қала тұрғыны:

- Жарық жазда жиі сөнеді. Бұл бәрімізге қиын. Кейбіреулер үйде отырып жұмыс істейді. Тұрмыстық техникаларымыз бүлініп жатыр.

Электр желісін жаңарту кезең-кезеңімен жүзеге асады. Соңғы жылдары ескі қосалқы станциялар қалпына келтіріліп, жаңадан 60-сы тұрғызылды. Қазір 15 станция толық жөнделіп жатыр. Бірақ тозған желілердің мәселесі сол күйінде. Биыл тек 74 шақырым желі жаңартылмақ. Оның жобалық-сметалық құжаттамасы әлі дайын емес.

Бексұлтан Шалабаев, Қалалық ТҮКШ бөлімінің басшысы:

- Ауыстыру жұмысы біздің алдағы жылыту маусымына дайындыққа дейін ауыстырып бітіруіміз керек. Қазір оған жобалық-сметалық құжаттамасы жасақталу үстінде. Ол жобалық-сметалық құжаттамасы осы аптаның аясында шығады. Шыққаннан кейін құны анықталады.

Электр қуатын жеткізуде ешқандай кедергі жоқ, — дейді мамандар. Басты мәселе – аптап ыстық. Себебі шіліңгір шілдеде жүктеме көбейді. Тұрмыстық техникалармен қатар мыңдаған салқындатқыш іске қосылады. Қазір әлеуметтік желіде жарықты кесте бойынша беру туралы ақпарат тарап жатыр. Бірақ әкімдіктегілер мұның жалған екенін мәлімдеді. Электр қуатымен қамту жұмыстары жүйелі түрде жүргізіледі.

Асланбек Шығыр, Тамара Степанова, Ренат Дусалиев 24KZ