Бұл туралы Алматы қаласының мемлекеттік активтер басқарма басшысының орынбасары Жантөре Айтжанов мәлімдеді.

Оның айтуынша, 2002 жылдан бастап 11 жекеменшік пен арнаулы орта білім беру мекемесіне, атап айтқанда «Ақ ниет», «Элко», «Лидер», «Арай», «Магистр», «Сенім», «Кәсіпкерлер мектебі», «Көгілдір желкен», «Теремок», «Айгерім» мен Алматы менеджмент және сервис колледжіне 10 балабақша мен бір комбинат ғимараты жалға берілген.

2020 жылдың мамыр айында қала басшылығы жеке ұйымдармен жасалған мүлікті жалға беру шарттарын кезең-кезеңімен бұзу туралы шешім қабылдаған. Ал 2023 жылдың маусым айында «Арай» мен «Сенім» мекемесіне нысандарды қайтару туралы ресми хабарлама жолданып, шілде айында арадағы жалға алу шарты бұзылғанымен, олар нысанды босатудан бас тартқан.

– Алматы қаласының Мемлекеттік активтер басқармасы Алматы қаласының Мамандандырылған ауданаралық экономикалық сотына талап арыз беріп, сот талапты қанағаттандырды. Соттың шешіміне қарамастан, «Арай» мен «Сенім» мекемесінің қызметкерлері бұл нысандарда әлі отыр. Алматыдағы Әділет департаментіне оларды мәжбүрлеп шығару материалы тапсырылды. «Арай» мекемесі ғимаратты 2025 жылғы 1 қыркүйекке дейін босатуды кейінге шегеруін сұрағанымен, 3 шілдеде өткен сот оған келіскен жоқ. Құқықтық рәсім аясында 2025 жылғы 14 пен 15 шілдеде Алматы қаласының Әділет департаменті жаңағы мекемелерді нысаннан шығара бастамақ, – деді Жантөре Айтжанов.