Ең жас министр 40-та болса, экология министрі Ерлан Нысанбаев былтыр зейнет жасына келді.

Бүгін мемлекет басшысы 20 күннен бері бос тұрған көлік министрі лауазымына Нұрлан Сауранбаевты тағайындады. Сондай-ақ, жақында ғана қорғаныс министрі ауысып, бұл қызмет тізгінін Дәурен Қосанов ұстаған еді. Осылайша, үкімет құрамы 2024 жылғы 6 ақпанда премьер-министр болып Олжас Бектенов тағайындалған уақыттан бері 36 пайызға жаңарды.

Атап айтқанда, премьер-министрдің екі орынбасары мен 7 министр жаңарыпты. Олар: премьер-министрдің орынбасарлары Қанат Бозымбаев пен Ермек Көшербаев, цифрлық даму министрі Жаслан Мәдиев, туризм және спорт министрі Ербол Мырзабосынов, әділет министрі Ерлан Сәрсембаев, энергетика министрі Ерлан Ақкенженов, өнеркәсіп және құрылыс министрі Ерсайын Нағаспаев, қорғаныс министрі Дәурен Қосанов пен су жаңа көлік министрі Нұрлан Сауранбаев.

Информбюро порталы Олжас Бектенов тағайындалған уақытта үкіметтің "орташа жасын" есептеп, оның 50 жас екенін анықтаған болатын. Қазір бұл көрсеткіш үкіметтегі ауыс-түйістер мен үкімет мүшелерінің бұл аралықта бір жас қосқанын есепке алғанда, 51 жасқа дейін өсті.

Айта кетейік, 2023 жылдың басында үкімет орташа 43 жасқа дейін жасарған болатын. Бұл – Қазақстан үкіметінің тарихындағы әзірге ең "рекорд көрсеткіш" болып отыр.

Қазіргі таңда ең жас министр – туризм және спорт министрі Ербол Мырзабосынов 40 жаста болса, ең егдесі – Ерлан Нысанбаев былтыр тамызда 63 – зейнет жасына толды.

Үкіметтің қазіргі құрамына қатысты тағы бір ерекше дерек – бізде Ерлан есімді үш министр бар. Олар: әділет министрі Ерлан Сәрсембаев, энергетика министрі Ерлан Ақкенженов пен экология және табиғи ресурстар министрі Ерлан Нысанбаев. Өзге министрлердің есімі қайталанбайды.

Оқи отырыңыз:

• Үкіметтің орташа жасы – 50 жас. Министрлер кабинеті қаншалықты жасарды?
• Үкіметтің орташа жасы – 43 жас. Министрлер кабинеті қаншалықты жасарды?