Сонымен қатар, донордың мөлдірқабықтары да алынып, болашақта көру қабілетін жоғалтқан науқастарға пайдаланылатын болады.
Алматы қаласында дәрігерлер жүрек, екі бүйрек және мөлдірқабықты трансплантациялау бойынша бір мезетте бірнеше күрделі отаны сәтті жүзеге асырды. 40 жастағы ер адамның ми өлімі тіркеліп, оның органдарын туған-туыстары басқа науқастарға өмір сыйлау үшін пайдалануға келісім берді.
Отаның басты кезеңі – донорлық жүректі алу мен оны жаңа иесіне көшіру болды. Донор – Алматы қаласының орталық қалалық ауруханасына жеткізілген, ми өлімі тіркелген 40 жастағы ер адам. Оның туыстары адам өмірін сақтап қалуға келісім беріп, үлкен жүректілік танытты. Донор жүрегі Талғар қаласының 43 жастағы тұрғынына, ауыр жүрек дертіне шалдыққан ер адамға салынды. Ол көп жыл бойы ишемиялық кардиомиопатия, жүре пайда болған жүрек ақауы және митральды қақпақша жеткіліксіздігі сынды күрделі диагноздармен өмір сүріп келген. Жүрек қызметінің негізгі көрсеткіші – шығару фракциясы – небәрі 26% ғана болған, бұл қалыпты деңгейден әлдеқайда төмен.
Сондай-ақ, 2022 жылы науқас жүрек инфарктіне ұшырап, содан бері денсаулығы күрт нашарлаған. Ол тіпті жеңіл қимылдың өзінде ентігу, әлсіздік, бас айналуға жиі шағымданған. Жүрек бұлшықетінің басым бөлігі тыртық тіндермен алмасып кеткендіктен, жиырылу қабілетінен толықтай айырылған. Науқасқа бұған дейін бірнеше рет стент орнатылған, одан бөлек, жүрек ырғағын реттеуге арналған кардиовертер-дефибриллятор имплантацияланған. 2024 жылдың қаңтар айында UMC мамандары оған жасанды сол жақ қарыншалық қолдау құрылғысын орнатуды ұсынған болатын. Алайда ер адам бұл әдістен бас тартты. Кейін дәстүрлі ем нәтижесіз болғандықтан, дәрігерлер оны жүрек трансплантациясын қажет ететін науқастардың ресми күту тізіміне енгізуге шешім қабылдады.
Оқи отырыңыз: 71 жастағы қазақстандық донор 16 мың доллардың қанын тегін өткізген
"Жүрек трансплантациясы – жүрек қызметі жеткіліксіздігінің соңғы сатысындағы пациенттерді емдеудің "алтын стандарты". Бірақ, өкінішке қарай, донорлық органдардың тапшылығына байланысты бұл мүмкіндік бәріне бірдей бұйыра бермейді. 2025 жылғы 10 мамырдағы жағдай бойынша, Қазақстанда жүрек трансплантациясын күту парағында 139 ересек және 7 бала тіркелген", – деді Кардиология және ішкі аурулар ғылыми-зерттеу институтының басқарма төрағасы Марат Пашимов.
Клиника басшылығының айтуынша, бұл жолы науқас донорды көп күтпеген.
"Біз жүрек трансплантациясы сынды оталар көптеген адамның өмірін сақтап қалуға көмектеседі деп сенеміз", – деп қосты дәрігер.
UMC "Жүрек орталығының" №2 кардиохирургия бөлімшесінің меңгерушісі Светлана Новикова мен Институттың кардиохирургия бөлімшесінің меңгерушісі Рүстем Төлеутаев бастаған тәжірибелі кардиохирургтар, анестезиологтар мен медициналық топ 5 сағатқа созылған жүрек трансплантациясы отасын сәтті орындады. Отадан кейін науқастың жағдайы тұрақты. Қазір ол жансақтау бөлімінен бейінді бөлімшеге ауыстырылып, толыққанды оңалтуға дайындалып жатыр.
"Жүрек трансплантациясы – бұл ең соңғы сатыдағы ем. Басқа тәсілдер нәтиже бермеген жағдайда ғана жасалады. Бұл отаның сәтті өтуі – бүкіл команданың үйлесімді жұмысының нәтижесі. Қазір науқастың жағдайы жақсы, оң динамика байқалып отыр. Енді ол толыққанды өмір сүруге мүмкіндік алды", – деді дәрігер дәрігер Рүстем Төлеутаев.
Бұл оқиға тек бір адамның ғана емес, бірнеше адамның өмірін сақтап қалуға себеп болды. Донордан алынған тек жүрек қана емес – екі бүйрек екі балаға сәтті трансплантацияланды. Сонымен қатар, донордың мөлдірқабықтары да алынып, болашақта көру қабілетін жоғалтқан науқастарға пайдаланылатын болады.
Оқи отырыңыз: Қазақстандықтардың органдары шетелдіктерге берілмейді. Үш мыңнан астам адам донорға зәру
