Депутат Мәжілістің жалпы отырысында елдегі анимация саласын сынады.

Сондай-ақ, ол премьер-министрдің орынбасары Ермек Көшербаевқа мәдениет саласындағы "қара тізім" мәселесінен ақпарат бере кетті, деп хабарлайды inbusiness.kz сайты.

Мәжілісмен сауалын анимация саласындағы сәйкессіздіктерден бастаған. Оның сөзінше, анимациялық фильмдердің көбі еш жерде көрсетілмеген.

– Қазақстандағы фактіге келсек, "Қазақфильм мен "Қазақ анимациясы" бірлестігі 5 жылда 1,4 млрд теңгеге 47 анимациялық фильм жасады" деген есеп бар. Мұндай қаржыландырудан кейін неге серпіліс болған фильмнің төртеуі ғана телеарналардан көрсетілді. Қалғаны эфирге де, экранға да, ешқайда шыққан жоқ. "Kazakh Animation" дейтін 475 оқырманы бар арнасы бар. Соған 12 мультфильм қойылған. Ең көп қаралым (44 мың) жинаған біреуі ғана. Бұл енді қиын жағдай ғой. Қазіргі маркетингтің, цифрландырудың заманында біз неге артта қалып қалып жатырмыз? Ақша бар, аудитория түсірген өнімдер неге жетпейді? Анимацияға бөлінген ақша неге ілгерілеуге жол ашпай отыр, – деп ашынады ол.

Халық қалаулысының сұрағына Мәдениет және ақпарат министрі Аида Балаева жауап қатты. Ол бұл мәселенің орынды көтерілгенін растайды, бірақ айтар уәжі де бар.

– Біз бұл мәселемен екі жылдан бері айналысып келеміз. Шынын айту керек, бірінші кезекте өнім жоқ болды. Екіншіден, сіз айтқан 47 өнімді бұқара халыққа көрсету үшін құқықтық негіз жоқ болды. Халықаралық шарт бойынша ондай өнімдер әртүрлі деңгейдегі халықаралық фестивальдің шеңберінде байқаулардан өтуі керек. Сондықтан, бұл жұмыс істеліп жатыр. Соның ішінде 47 өнімнің жартысы халықаралық байқаудан өтті. Басқалары фестивальдерге қатыстырылып жатыр. Өзіңіз айтып отырған бұл мәселеде арнайы маркетинг, стриминг жүйелерде тарату жүйесі болған жоқ. Оны біз 2024 жылдан бастап қолға алдық. Қазір жаңа анимациялық өнімдердің 25-і "Қазақстан" ұлттық арнасында, 69-ы "Хабар" телеарнасында орнатылды, – деді ол.

Депутат Ринат Зайыт мәдениет саласында "қара тізім" деген жағымсыз жайттың барын, оған кезінде өзі де бірнеше рет іліккенін мәлімдеп отыр.

– Ермек Беделбайұлы, біздің қоғамда "қара тізім" деген бәле бар. Мен өзім де бірнеше рет болғанмын онда. Қазір де соның әңгімесі шығып жатыр. Осы "қара тізім" бойынша көмектесуге қалай қарайсыз? – деп сұрады депутат.

Өз кезегінде Ермек Көшербаев "қара тізім" жайын маңызды сұраққа балағанымен, мардымды жауап бермеді.

– Бұл – өте маңызды сұрақ. Себебі, ұлттық идеологиямызға жатады. Келер ұрпақ қай тілде сөйлейді, қай ұлттың мүшелері болады, өте маңызды. Айтылған сын өте орынды. Иә, осындай ақшамен бұл сала дамуы керек еді. Соңғы кезде кинематография, анимация салаларында бірталай өзгеріс енгізіліп жатыр. Бұл жерде тағы кәсіптік мәселелер өте маңызды. Жақын арада бұл мәселені қозғалтамыз деп ойлап отырмын, – деді вице-премьер.