Мұндайда жастардың бірі келісімнен бас тартса, екіншісі қалыңмалды қайтаруды талап етіп, тіпті заңгерлердің көмегіне жүгініп жатыр.

Соңғы уақытта елімізде үйленбей жатып құдалық жасап, қалыңмалын беріп қойғанымен, той болмай қалған жағдайлар жиілеген, деп жазады inbusiness.kz сайты.

Кейде екі жақ құдалық өткізіп, кәде жасап, сый-сияпат алмасқанымен, некеге дейін қарым-қатынас үзіліп жатады. Мұндай жағдайда көпшілік қалыңмал мен бағалы сыйлықтар кері қайтарылуы тиіс деп есептейді.

– Қалыңмал – екі жас арасындағы келісімнің бір бөлігі. Егер қыз келін ретінде қызмет етпесе, келісім орындалмаған болып есептеледі. Сондықтан қалыңмалды қайтару әділетті шешім деп ойлаймын, – дейді тұрғындардың бірі.

Заңгерлер де бұл мәселе қоғамда өзекті бола бастағанын растайды. Олардың айтуынша, қалыңдық босаға аттамаса, келісім бұзылады. Ал кейбір жағдайларда мұндай жайтты жеке пайдаға пайдаланатындар да кездеседі.

– Қыз тұрмысқа шығудан бас тартса, ал жігіт жағы келісімнің бұзылғанын растай алса – мысалы, куәгерлер немесе жазбаша дәлелдер болса – азаматтық сотқа жүгініп, қалыңмал мен кеткен шығынды қайтарып алуға құқылы, – дейді заңгер Ғабит Өмірбек.

Мамандардың айтуынша, сотта талап қоюшы тек ақша емес, сыйлық немесе құдалық кезінде берілген өзге де заттарды қайтаруды сұрай алады.