Израиль Иран аумағындағы әскери және инфрақұрылым нысандарына тағы да соққы жасады. Бұл жолы Тебриз әуежайы мен Шираз қаласындағы әскери зауыт нысанаға іліккен. Израиль армиясы шабуылды ұшқышсыз басқарылатын құрылғылармен іске асырғанын растады, деп хабарлайды Skifnews.kz ақпарат порталы.

ЦАХАЛ таратқан ресми ақпаратқа сәйкес, Шираздағы нысандарда Ислам революциясы сақшылар корпусының (КСИР) штабтары, баллистикалық зымыран өндірісі және оқ-дәрі қоймалары орналасқан. Жергілікті БАҚ шабуыл салдарынан адам өлімі тіркелгенін хабарлап отыр.

Бұған дейінгі әуе соққысының кезінде КСИР басшысы Хоссейн Салами мен бірнеше ядролық ғалымның қаза тапқаны белгілі болған. Reuters агенттігінің дереккөздері бұл шабуылдан КСИР-дің кемінде 20 жоғары шенді командирі ажал құшқанын, олардың арасында әуе-ғарыш күштерінің басшысы Амир Али Хаджизаде де бар екенін хабарлады.

Осы оқиғалар аясында АҚШ-тың бұрынғы президенті Дональд Трамп та мәлімдеме жасап, Иранға ядролық келісімге келу үшін бірнеше мәрте мүмкіндік берілгенін еске салды. Алайда Трамптың айтуынша, Тегеран бұл ұсыныстарға құлақ аспаған.

“Иранмен мәміле жасалмаса, салдары өте ауыр болады. Мен оларды ескерткенмін” – деді ол.

АҚШ шабуылдарға тікелей қатысы жоғын ресми түрде мәлімдегенімен, Axios басылымының дереккөздері басқа мәлімет келтіреді. Израиль тарабы шабуыл алдында Вашингтонмен келіссөз жүргізілгенін, ал Трамп жеке кездесулерде бұл әрекетке қарсылық білдірмегенін айтады.

“Бізге “жасыл жарық” берілді” – дейді израильдік шенеуніктер.

Аймақтық ахуал одан әрі шиеленісе түсті. Израиль Сыртқы істер министрлігі әскери операцияның жалғасатынын мәлімдеді. Осы уақытта Натанз қаласындағы уран байытатын жерасты зауыты да шабуылға ұшырағаны белгілі болды. Израиль армиясы бұл ақпаратты да растап отыр.