Бұл туралы облыстық кәмелетке толмағандар істері жөніндегі мамандандырылған ауданаралық соты хабарлады.

Ақтөбе облысы Мұғалжар ауданындағы Қ.Жұбанов атындағы ауылдық округтің әкімі Ләззат Бердібаеваға қатысты әкімшілік іс тоқтатылды, деп жазады inbusiness.kz сайты.

Іс материалдарына сәйкес, сәуір айында әлеуметтік желіде Ләззат Бердібаеваның қызғалдақ ұстап түскен суреті тараған еді. Осыған байланысты әкімге қатысты ҚР Әкімшілік құқықбұзушылық туралы кодексінің 127-бабының 1-бөлігі бойынша іс қозғалды. Алайда сот бұл істі тоқтатты.

Судья Айпатша Мусинаның айтуынша, хаттама толтырған лауазымды тұлға оқиға болған орынды нақты анықтамаған. Бұл жайтты анықтау үшін көшпелі сот отырысы ұйымдастырылып, ботаникалық-ғылыми сараптама тағайындалған. Сараптама нәтижесінде фотосуреттегі қызғалдақтың нақты түрі анықталмаған. Сонымен қатар, әкімшілік құқықбұзушылық жасалғанын дәлелдейтін нақты құжаттар да ұсынылмаған.

Сотта сөз сөйлеген Ләззат Бердібаева өз әрекетінде құқықбұзушылық болмағанын айтып, істі тоқтатуды сұрады.

– Оқиға балаларыммен бірге табиғат аясында демалып жүргенде болған. Олар 6 және 8 жаста, қызғалдаққа қызығушылық танытқаны – жастарына тән әрекет. Ешқандай қорғалатын аймаққа кірген жоқпыз, ескерту белгілері де болған жоқ. Құқықбұзушылық ниетіміз болмады, – деді әкім.

Сот шешімімен әкімге қатысты әкімшілік іс тоқтатылды. Судья полиция қызметкерінің әрекетіне назар аударып, құқықбұзушылықты болдырмауға бағытталған шаралар қабылдауды ұсынды.