Бұл сұраққа Бас прокурордың орынбасары Әсет Шындалиев жауап беріп көрді.

Оның сөзінше, Шерзат Полаттың өліміне қатысты ашық сот процесі жоғары деңгейде өткен, деп жазады inbusiness.kz сайты.

Шындалиев арыз түскенде ғана шешім шығарылатынын айтады.

– Мен тек күдіктілердің туыстары немесе басқа адамдардың сөзіне сүйеніп пікір білдіре алмаймын. Қылмыстық іс қозғау үшін жеткілікті негіздер болуы керек. Қылмыстық қудалау органы іс қозғау туралы шешімді тиісті арыз түскен жағдайда ғана қабылдайды. Ал арыз берілді ме, жоқ па білмеймін, – деді ол.

Бас прокурордың орынбасарының айтуынша, ашық сот отырысы қоғам тарапынан күдік туындамас үшін өткізілген. Әрі үкім оқылмас бұрын барлығы ескерілген.

– Процесс сапалы, ашық және объективті өтті. Үкім шығарғанда барлық дәлел мен айғақтар ескерілді. Ашық сот процестерінің мақсаты – қоғамға соттың әділ әрі ашық түрде өтіп жатқанын көрсетіп, күмән қалдырмауы, – деп сөзін нақтылады Ә.Шындалиев.

Бұған дейін "Шерзат ісі бойынша сот үкімі шыққандарға рақымшылық жасала ма?" деген тақырыпта материал жариялаған едік.