Көкшетауда үйлену тойы күні қаза тапқан азаматқа қатысты қылмыстық іс бойынша сот үкімі шықты, деп хабарлайды El.kz интернет порталы.

Сот мәліметінше, Б. есімді азамат 16 жылға бас бостандығынан айырылды. Сонымен қатар, жәбірленуші тарапқа моральдық зиян ретінде 10 млн теңге өтемақы өндірілді. Үкім әлі заңды күшіне енген жоқ.

2024 жылдың қараша айында С. есімді азамат Көкшетаудағы ойын-сауық орындарының бірінде достарымен бірге некесін қиюды атап өткен. Сол кеште Б. есімді сотталушы да достарымен сол мекемеде болған.

Екі компания арасында ауызша жанжал туындап, кейін төбелеске ұласқан. Сол сәтте Б. С.-ке пышақпен үш рет соққы жасаған, оның бірі жүрекке тиген. Жәбірленуші жедел жәрдем келгенге дейін оқиға орнында көз жұмған, – делінген ресми хабарламада.

Сотта Б.-ның кінәсі куәгерлердің сөзімен, бейнебақылау камераларынан алынған жазбалармен және сараптамалық қорытындылармен дәлелденген.

Бұған дейін жанармай құю бекетінде болған өртке қатысты сот үкімі шыққанын жазған едік.