Азаматтарды әскери қызметке шақыру да жетілдіріле түспек.

Бұл туралы заңды Мәжіліс екінші оқылымда қабылдаған, деп хабарлайды inbusiness.kz сайты.

Онда әскери-патриоттық тәрбие, әскери қызмет және жекелеген орталық мемлекеттік органдардың функцияларын қайта бөлу мәселелері бойынша өзгерістер мен толықтырулар енгізу мәселесі көтерілген. Түзетулерге тікелей депутаттар бастамашы болған. Құжат азаматтарды әскери-патриоттық тәрбиелеудің кешенді жүйесін құру, осы жұмысқа барлық мемлекеттік орган мен ұйымдарды тарта отырып, олардың қызметін үйлестіру мақсатымен әзірленді. Ол 2024 жылдың 6 қарашасында бірінші оқылымда мақұлданды.

– Заң осы бағыттағы жұмыстарды жандандыра отырып, азаматтарды әскери-патриоттық тәрбиелеудің маңыздылығын арттыруға бағытталған. Оның аясында білім беру ұйымдарындағы әскери дайындық жетілдіріледі. Алғашқы әскери дайындық пәнінің оқытушыларына міндетті әскери қызметін өтеу туралы талаптар күшейтіліп, әскери кафедраларда сабақ беретін әскери қызметкерлердің мәртебесі белгіленді.

Білім беру ұйымдарында, оқушылар сарайларында, әскери бөлімдерде жұмыс істейтін әскери-патриоттық клубтар, үйірмелер қосымша білім беру аясында өз қызметін жүзеге асыра алады. Сонымен қатар, әскерге шақыруға дейінгі дайындық бойынша қосымша білім берудің бағдарламалары бойынша оқитын тұлғалар "Жас айбын" мәртебесін алады, – делінген ресми хабарламада.

Осы арқылы әскери қызметтің де беделі арта түспек. Енді әскери борышын өтеуге міндетті Қазақстан азаматтарының тұрғылықты жері бойынша да әскери дайындықтан өтуге мүмкіндігі бар. Әрі әскери есепке алу автоматтандырылады, сосын азаматтарды әскери қызметке шақыру жетілдіріледі. Әскери қызметке шақыруды кейінге қалдыру және босату негіздері де оңтайландырылмақ. Осылайша, Қарулы Күштердің, басқа да әскерлер мен әскери құралымдардың жасақталуы ұлғайтылады деп жоспарланған.

Ең бастыларының бірі, Өнеркәсіп және құрылыс министрлігінің мемлекеттік қорғаныс тапсырысы аясындағы функциялары Қорғаныс министрлігіне берілмек.