Бұл жағдай сот залында және оның маңында тіркелді .

Шерзат ісі бойынша үкім жарияланғаннан кейін сотталғандардың туыстары сот шешіміне наразы болып, қоғамдық тәртіпті бұзуға тырысқан, деп жазады inbusiness.kz сайты.

Жетісу облыстық Полиция департаментінің мәліметінше, құқықбұзушылық әрекеттердің жолы уақытында кесілген. Қоғамдық орындарда балағат сөз айтып, агрессия танытқан әйел адам әкімшілік жауапкершілікке тартылды.

Ведомство сот процесі өткен аумақта қоғамдық тәртіп пен қауіпсіздік толық қамтамасыз етілгенін атап өтті.

– Құқық үстемдігіне қысым жасауға жол берілмейді. Сот актілерінің орындалуына кедергі келтіру, сотқа құрметсіздік таныту немесе жағдайды тұрақсыздандыруға бағытталған кез келген әрекет заң аясында қатаң түрде тоқтатылады, – делінген ресми хабарламада.