Бағалы металдың бағасы қайтадан аспандап барады, сарапшылар себебін айтты.

Айта кету керек, 2024 жылы алтынның құны 27%-ға өсті. Мұндай табысты бірде бір депозит бере алмайтыны белгілі. Бірақ банктік депозиттен басты айырмашылығы, алтын ешқандай өсімге кепілдік бермейді.

Дегенмен, биылғы жылы өсім жалғасты. Осы аптада оның әлемдік биржалардағы құны 1 Троя унциясы үшін 3 400 доллардан асты. Осылайша, 8 мамырдан бері қайтадан қымбаттап, 3,4 мың долларлық белесіне оралған еді.

Апта басында Чикаго тауар биржасында (CME) алтынның биылғы тамызда жеткізуге арналған фьючерстерінің котировкасы бірден 2,59% өсіп, унциясы үшін 3 401,3 долларға жетті.

Бірақ артынша, 5 шілдеде 3 383 долларға дейін төмендеді. Сарапшылар мұны уақытша құбылыс санайды. Өйткені бүгінде инвесторлар болашағын болжап болмас аумалы-төкпелі шақта өз активтерінің басым бөлігін қорғап қалуға тырысуда. Сондықтан дәстүрлі активтерге, соның ішінде негізінен алтынға және басқа бағалы металдарға салуда.

Reuters сарапшылары АҚШ долларының бүкіл әлемде қатты құнсызданып жатқаны, сондай-ақ Трамп пен Путиннің солақай саясаттарынан туындаған геосаяси қауіп-қатерлер және әлемдік экономикадағы белгісіздік алтынның өсуіне дем беретінін алға тартты. Осы факторлар өзгермесе, ахуал түзелмесе, алтын ары қарай қымбаттай беруі мүмкін.

Reuters мәліметінше, Дональд Трамптың Америкаға экспортталатын болат пен алюминийге қарсы 50%-ға дейінгі тарифті енгізуі, сауда баж алымдарын көтеру райынан қайтпауы, сондай-ақ Мәскеудің Украинаға қарсы соғысты тоқтатудан бас тартуы инвесторлардың тәуекелге бас тігуден аяқ тартуына әкелді.

Нарықтар жаһандық дағдарысқа әзірленуде. Дүниежүзілік күйзелістер кезеңінде алтын үнемі қымбаттайды.

Мысалы, 2025 жылды алтын 1 Троя унциясы үшін 2 700 доллармен бастаған еді. Сонда бірқатар сарапшы келесі меже – 2800–3000 доллар болатынын болжады.

Алтынның қарқыны олардың ең батыл болжамдарынан да асып түсті. Кезекті тарихи рекорд бұл бағалы металға сәуір айында бағынды: бір унциясы 3 200 долларға жетті. Одан кейін шамалы уақытқа төмендеді. Енді 3 400 долларлық белесті қайта-қайта шабуылдап жатыр.

Таяуда америкалық инвестор, қаржылық сауаттылық бойынша "Бай әке, кедей әке" бестселлерінің авторы Роберт Кийосаки үрейлі болжам жасады. Оның тұспалдауынша, егер доллар индексі ары қарай да қазіргідей құлдырай берсе, онда болашақта алтынның құны 25 000 долларға дейін жетуі мүмкін. Бұл қазіргі құнынан 7 еседен астам көп.

Кийосаки тым түнеріңкі, пессимистік болжамдар жасауымен әйгілі. Ал, өзге аналитиктер сауда соғысының тыйылмауы және жаһандық дедолларизацияның өрістеуі аясында алтынның келесі шыңы 4 000 доллар болатынын айтуда.

Merk Investments бас директоры Аксель Мерк алтын мен доллар құнының арасында өзара байланыс барын жеткізді. Оның байламынша, жаһан жұртшылығы Екінші Дүниежүзілік соғыс аяқталғалы бері алғаш рет тектоникалық бетбұрыстарға куә болуда.

Соның қорытындысында АҚШ әлемдік тәртіп сақшысы рөлін орындамайтын болады. Тиісінше, ол жаһандық көшбасшы мәртебесінен де айрылады.

Биыл халықаралық рейтинг агенттігі оны "ААА" ең жоғарғы рейтингінен айырды. Сарапшылардың пікірінше, бүгінде доллар өзіне деген сенімді жоғалтудың тарихта теңдесі жоқ кезеңін өткеруде.

Сарапшы Аласдер Маклаудтың дерегінше, бір жағынан, сатып алу қабілеті тұрғысынан долларға деген сенім қалмай бара жатқандықтан, алтын өсуде. Екінші жағынан, тәуелсіз мемлекеттер доллардың қауіпсіздігіне күмәндана бастады.

Сондықтан биылғы мамырда АҚШ өзінің мемлекеттік облигацияларын саудаға шығарғанда оны сатып алуға ешбір инвестор, бірде бір мемлекет қызықпаған. Мұндай жайт бұрын-соңды болмапты.

Осы орайда JPMorgan аналитиктері алтынның 4 мың долларлық межені қаншалықты тез еңсере алатынын бағамдады. Олар әрбір келесі 1 000 долларлық межені бағындыруға жұмсалатын уақыт алдыңғыға қарағанда үштен екіге қысқаратынын анықтаған.

Сондай-ақ инвесторлардың толық сандарды жақсы көретіні, цифрларды дөңгелектейтіні ескерілген. Олай болса, келесі дөңгелек сан – 4 мың доллар тым алыс болмауы мүмкін.

"2 жыл бұрын ғана алтынның унциясы 1 мың 650 доллар тұрды. Бүгінде екі еселенді. Қазіргі өсім динамикасы 2008–2011 жылдардағы емес, 2000–2011 жылдардағы құбылуларға көбірек ұқсайды. Алдағы айларда алтын бағасы қалай құбылса да, түптің түбінде бағалы метал иелері бәрібір ұтады. Ал, тапқан-таянғанын фиатты ақшада, кез келген қағаз валютада сақтаған адамдар ақыры онысына өкінуі мүмкін", – деген ойда JPMorgan сарапшылары.

Сонымен қатар, алтынның сатып алушылық қабілетіне сене қоймайтын сарапшылар да бар. Олардың түсіндіруінше, егер ондаған жылдар бойы жиналған инфляцияларды есепке алса, онда алтын осыдан 50 жыл бұрынғы бағасынан көп қымбат тұрады деп айту қиын.

Скептиктерге жауабы ретінде "Сенімді қаржы үшін" қозғалысының америкалық Юта штатындағы өкілі Кен Айвори келесідей дәйектеме келтірді.

"1971 жылы сіз 20 000 долларға немесе 563 унция алтынға Солт-Лейк Ситиде бір үй сатып ала алатынсыз. Бүгінде қалада орташа статистикалық үйдің бағасы 600 000 долларға дейін қымбаттады. Алайда 563 унция алтынға сіз үштен көп үй сатып ала аласыз. Яғни, үйлер қымбаттаған жоқ, доллар құнсыздануда", – дейді Айвори.

HSBC аналитигі Джеймс Стилдің айтуынша, спекуляциялар емес, үрей – алтынның құнын жоғарыға итермелеуде. Өйткені үлкен әлем, алпауыттар жүйкесі жұқарып, жындану, ядролық шоқпарларын сілтеу алдында тұрғанда, алтын – буырқанған мұхиттағы инвесторлар үшін тыныштық аралы болады.

Сондай-ақ егер әлемде әлдеқалай жаппай бейбітшілік пен татулық орнай қалса, онда инвесторлар қайтадан тәуекелді құралдарға кетіп, алтын бағасы түсуі ықтимал.

Бұл үшін ғажайып керек:

• Мәскеу және Киев татуласып, соғыс аяқталуға тиіс,
• Израиль көршілеріне қанды қырғын, басқыншылықтан бас тартып, бітімге келіп, Таяу Шығыста бейбітшілік орнауы қажет,
• Трамп тарифтерін тыйып, әдеттегі әділетті саудаға оралуы шарт,
• Әлемдік экономика қайтадан қарқынды өсім жолына шығуы керек,
• Жаһандық қор нарығы әйгілі әпендінің әрбір мәлімдемесі мен әлеужелідегі постынан қалтырамайтын жағдай қалыптасса, жөн.

Сарапшылар әзірге бәрі керісінше болып тұрғанын айтады. Тиісінше, алтынның да өсер өрісі алда сияқты. Бұл әлі финал емес.

Біз өз тарапымыздан бұл материалдың тек оқырманды ақпараттандыру мақсатын көздейтінін, инвестициялық рекомендация немесе кеңес болып табылмайтынын ескертеміз. Әр адам ақшасын қайда инвестициялайтынын мамандармен ақылдаса отырып, жеке өзі шешуге тиіс.