Жігіттің есі дұрыс деп танылды.

21 жастағы Нұрай Серікбайдың өліміне күдіктіге қатысты тың мәлімет белгілі болды, деп хабарлайды inbusiness.kz сайты Tengrinews.kz-ке сілтеме жасап.

Марқұмның отбасының адвокаты Аянхан Омаровтың сөзінше, күдікті Алматы облысында сараптамадан өткеннен кейін мамыр айының басында қайтадан тергеу изоляторына ауыстырылды.

"Қазір ол Шымкент қаласындағы Қылмыстық-атқару жүйесі комитетінің №69 мекемесінде отыр. Денсаулығы жақсы, есі дұрыс деп танылды", – деді адвокат.

Омаровтың айтуынша, жәбірленуші тарап күдіктінің туыстарын қызды алып қашуға қатысқаны үшін жауапқа тартуды талап етіп отыр.

"Біз күдіктінің туыстарын алдын ала сөз байласу арқылы топ болып қызды некеге тұруға мәжбүрледі деген бап бойынша жауапқа тарту туралы полицияға бірнеше рет арыздандық. Арыздар қабылданды, бірақ та мәселе әлі қаралып жатыр", – деп атап өтті адвокат.

Сондай-ақ марқұмның туыстары айыпты Қылмыстық кодекстің 125-1-бабының 1-бөлігінен 3-бөлігіне ауыстыруды сұрап отырғаны айтылды.