Бастама Ақтау және Жаңаөзен қалаларын, Шетпе, Бейнеу, Құрық ауылдарын қамтиды.

ҚР Оқу-ағарту министрлігінің қолдауымен Цифрландыру және жасанды интеллект жылы аясында Маңғыстау облысында STEM Hanym білім беру бастамасы іске қосылады. Жоба аясында 300-ден астам әйел-педагог робототехника және заманауи STEM бағыттары бойынша тегін оқиды, деп хабарлайды inbusiness.kz сайты.

STEM Hanym жобасына онлайн оқудан және конкурстық іріктеуден сәтті өткендер қатыса алады. Бағдарлама педагогтерге, педагогикалық факультеттердің студенттеріне, ерекше білім беру қажеттілігі бар балаларды тәрбиелеп отырған аналарға, сондай-ақ технологиялар мен цифрлық мамандықтар саласында дамуға қызығушылық танытатын ерекше қажеттілігі бар әйелдерге арналған.

Жоба STEM саласындағы әйелдердің рөлін арттыруға, өңірлерде инженерлік білім беруді дамытуға және робототехника бойынша жаңа буын тәлімгерлерін даярлауға бағытталған.

Оқыту жергілікті жерлерде ұйымдастырылады. Тәжірибелі тренерлер өңірлерге барып, тәжірибелік сабақтар өткізеді.

Қатысушылар 3D модельдеу, робототехника, жасанды интеллект, инженерлік ойлау, командалық жұмыс негіздерін меңгеріп, оқушыларды халықаралық технологиялық жарыстарға дайындау дағдыларын үйренеді.

STEM Hanym жобасының алғашқы легі 2025 жылы Атырау облысында жүзеге асырылып, онда 300-ден астам әйел оқудан өтті. Бағдарлама түлектері бүгінде Қазақстан атынан республикалық және халықаралық робототехника чемпионаттарына, соның ішінде Хьюстонда өткен FIRST әлем чемпионатына қатысып жүр.