Олар арнайы көзілдірік құрастырып, робототехника кітабын да әзірлеген.

Зерек оқушылар ерекше "ақылды" технологиялары арқылы АҚШ-та жоғары бағаға ие болған, деп хабарлайды inbusiness.kz сайты.

Олар "ақылды" көзілдірікті жасауға 2 жыл уақыт жұмсаған. Құрылғыға орнатылған микрофон сөйлеген сөзді қабылдап, арнайы жүйе оны мәтінге айналдырады. Ал мәтін пайдаланушының көз алдына, линзаның бетіне бірден шығады. Осылайша, есту қабілеті нашар адамдар әңгімелесушінің сөзін нақты уақыт режимінде оқи алады.

"Мектебімізде заманауи құрал-жабдық көп. Көзілдіріктің қаңқасын 3D-принтер арқылы шығардық, бағдарламасын шағын компьютердің көмегімен жасадық. Кейбір бөлшектерді Қазақстанның өзге қалаларынан және Қытайдан алдырдық", – дейді НЗМ оқушысы Ырысбек Ұлықбеков.

Оқушылардың тағы бір жобасы – көзі көрмейтін балаларға арналған робототехника кітабы. Оның көмегімен ерекше қажеттілігі бар балалар робот жасаудың бастапқы негіздерін меңгере алады. Кітаппен бірге құрылғыларды құрастыруға арналған қарапайым бөлшектер жиынтығы да беріледі.

"Бұл идея көзі көрмейтін балалар кітапханасына барғаннан кейін пайда болды. Онда роботтар мен трансформерлерге қызығатын балалар көп екенін көрдім. Сол кезде "оларды да робототехникамен неге таныстырмасқа?" деген ой келді", – дейді жас өнертапқыш Ерсұлтан Арын.

Шымкенттік оқушылардың жобалары халықаралық деңгейде де мойындалып отыр. Олар АҚШ-тың Хьюстон қаласында өткен робототехникадан әлем чемпионатында бірінші орынды иеленді. Қазір олардың жобаларына шетелдік компаниялар қызығушылық танытып, технологияларды әрі қарай дамытуға қолдау көрсетуге дайын екенін білдіруде.

"Бұл – бүкіл оңтүстік өңірі үшін үлкен мақтаныш. Оқушылардың жетістігі басқа жастарды да халықаралық байқауларға қатысып, өз идеяларын дамытуға жігерлендіреді деп сенеміз", – деді НЗМ ұстазы Талғат Құрашқалиұлы.

Осылайша, жас өнертапқыштар өңірдегі ғылым мен технологияның дамуына айтарлықтай өз үлесін қосып жүр.