Қостанайлықтар Президенттің жолдауын талқылап, басты бағыттар мен бастамалар туралы ой-пікірін ортаға салды.
Стратегиялық маңызды құжатты көпшілік оң қабылдады. Президент бұл жолы — «жасанды интеллект пен цифрландыру» мәселесіне баса назар аударды. Дамыған елдердің әлдеқашан инновацияға бет бұрып, цифрландыру арқылы жаңа мүмкіндіктерге қол жеткізгені белгілі. Бұл үрдістен Қостанай да шет қалмақ емес. Мысалы, тамызда өткен «Qostanai Investment Forum» шарасында облыс мамандары жасанды интеллектке басымдық бере отырып, цифрлық трансформация стратегиясын ұсынған еді.
Озық технологиялардың экономикаға тың серпін беретін қозғаушы күш екені белгілі. Облыс әкімі Құмар Ақсақалов заманның талабынан қалыс қалмай, жасанды интеллекттің әлеуетін тиімді пайдалану қажеттігіне тоқталды.
Құмар Ақсақалов, облыс әкімі:
- Бұл біздің өңір үшін жаңа мүмкіндіктерге жол ашады. Қазіргі таңда жасанды интеллект адам өмірінің барлық саласына еніп жатыр. Жақын болашақта бізге негізгі салаларда серпіліс жасауға мүмкіндік береді. Мысалы, жасанды интеллектті енгізу дәстүрі ауыл шаруашылығынан интеллектуалды ауыл шаруашылығына көшуді қамтамасыз етеді.
Астықты өңірде ауыл шаруашылығына озық технологиялар енгізіліп жатыр. Дегенмен атқарылар жұмыс әлі де көп. Жалпы барлық сала бойынша озық үрдістерді енгізуде білім беру саласының үлесі зор. Сондықтан ғылым мен өндіріс арасындағы байланысты күшейту – басты міндеттердің бірі болмақ.
Дәурен Ниязбаев, «Қазақинвест» АҚ өңірлік директоры:
- Мемлекет басшысы өз Жолдауында атап өткендей, алдымызда инвестицияларды өңдеуші өнеркәсіпке бағыттау міндеті тұр. Бұл ретте бірқатар өңірлер, соның ішінде Қостанай облысы да ерекше атап өтілді. Өңірде ірі машина жасау және металлургия кәсіпорындары іске қосылды. Солардың бірі – KIA автокөліктерін шығаратын зауыттың құрылысы, бұл — маңызы зор жобалардың бірі.
Мемлекет басшысының тапсырмаларын іске асыру мақсатында Қостанай облысында цифрлық штаб құрылатын болады. Бұл құрылым өңірдегі цифрлық трансформация үдерістерін тиімді үйлестіруге, сондай-ақ инновациялық технологияларды экономика мен әлеуметтік өмірдің түрлі салаларына жедел енгізуге мүмкіндік береді.
Авторлары: Қарлығаш Қасиетова, Сергей Трахтенберг, Марат Игликов.
