KEGOC компаниясы 2029 жылға дейін электр инфрақұрылымын жаңғыртып, қосымша 1837 мегавольт-ампер қуат енгізуді жоспарлап отыр, деп хабарлайды 24kz.

Ірі жобалар қатарында «Солтүстік–Оңтүстік» бағытындағы желі құрылысы, Батыс Қазақстанның энергия жүйесін елдің бірыңғай желісіне қосу, сондай-ақ жаңа технологиялар негізінде тұрақты тоқ желілерін енгізу бар. KEGOC операторы өткен жылды қорытындылап, болашаққа арналған жоспарын айтты.

2024 жылы KEGOC компаниясы Қазақстанның энергетикалық қауіпсіздігін қамтамасыз етуде жаңа деңгейге көтерілді. Елде электр энергиясын тұтыну 4,3% артты. Ал KEGOC тасымалдаған энергия көлемі 93,9 миллиард киловатт-сағатқа жетіп, 2023 жылмен салыстырғанда 30%-ке өсті. Компания Қазақстанның энергетикалық қауіпсіздігін қамтамасыз ету бағытында ауқымды жобаларды іске асырып жатыр.

Нәби Айтжанов, KEGOC АҚ басқарма төрағасы:

- Біз әр өңірде электр қуаты қорын жасақтайтын бағдарламаны айқындадық. Біздің есебімізге сай Қазақстан аймақтарында қуат көзінің қоры 30% болу керек. Бұл экономика мен жаңа инвестициялық жобалардың дамуы үшін қажет.

KEGOC энергетикалық инфрақұрылымды жаңғыртуға басымдық беріп отыр. 2025 жылдың соңына дейін еліміздегі негізгі қосалқы станцияларда қуатты автотрансформаторлар ауыстырылып, қосымша 876 мегаватт қуат көзі енгізіледі.

Эльвира Қонақбаева, KEGOC АҚ Стратегия және тұрақты даму жөніндегі басқарушы директоры:

- Қазіргі уақытта біз екі үлкен инвестициялық жобаларды жүзеге асырып жатырмыз. Ол «Оңтүстік» аймағының желілерін нығайту, сонымен қатар Батыс Қазақстан облысындағы желілерді бірыңғай электр энергетикалық жүйемен біріктіру болып табылады. 2035 жылға дейін 30 гигаватт жаңа электр энергия көздері қосылады.

Ірі жобалардың бірі – Астанадағы жаңа цифрлық қосалқы станция құрылысы. Ол елорда үшін екінші қуат көзіне айналады және ТМД елдеріндегі ең ауқымды станциялардың қатарына кіреді деп күтілуде. Жобаны 2028 жылға дейін іске асыру жоспарланған.

Авторлары: Ғазиза Мұхамеджанов, Руслан Әлиев, Ескендір Сергалиев