Астанада 28-29 маусымда Жастар театрында шығыс әлемінің шымыр аңызына негізделген «1001 түн» спектаклінің премьерасы өтті, деп хабарлайды El.kz интернет порталы.

Ерекше қойылым көрерменді қиял-ғажайып әлемге жетелеп, сахнада терең философиялық ой мен эмоциялық арпалысты қатар ұсынды.

Суреттер: Амангүл Тілейқызы

Қойылым Қазақстанның еңбек сіңірген қайраткері Ермек Аманшаевтың «Қыр астындағы сол бір ғажайып әлем» атты әфсанасының желісімен жазылған. Ал режиссёрлік тізгінді Қазақстанның еңбек сіңірген қайраткері, ҚР Мемлекеттік сыйлығының лауреаты Нұрқанат Жақыпбай ұстаған. Өзінің айрықша режиссёрлік қолтаңбасымен ол спектакльге терең мағына мен заманауи сахналық көркемдікті дарыта білді.

Сурет: Амангүл Тілейқызы

Бұл шығарма осыдан 20 жыл бұрын Алматыдағы Ғабит Мүсірепов атындағы Қазақ мемлекеттік академиялық балалар мен жасөспірімдер театрында қойылған еді. Уақыт өте келе, осы туындыны жаңа қырынан, бүгінгі заманға бейімдеп, Жастар театрының сахнасына қайта әкелуді жөн санадым. Бұл театрдың актёрлік құрамы мен шығармашылық әлеуетіне сенгендіктен, мүлдем өзгеше режиссёрлік көзқараспен қойып отырмын. Бұрын комедияға жақын қойылым болса, бұл жолы терең философиялық мәнге, көрерменді ойға жетелейтін астарлы драмалық бағытқа ден қойдық, – дейді Нұрқанат Жақыпбай.

Халық назарына ұсынылған оқиға – билікке кенеттен ие болған Әбілқасанның ішкі арпалысы, жүрек пен ақылдың күресі, сенім мен күмәннің, кек пен кешірімнің ара-жігін айқындайтын оқиға. «Егер ғайыптан тайып, бір күні таңда патша болып оянсаңыз – не етер едіңіз?» деген сұрақтан бастау алатын қойылымда көрермен биліктің тек бақыт емес, үлкен жауапкершілік екенін ұғынады.

Суреттер: Амангүл Тілейқызы

Сахнада орын алған әрбір қимыл мен сөз, музыкалық сүйемел мен би, жарық – барлығы да көркем үйлесім тапқан. Залда отырған жұртшылық оқиғаға еніп, кейіпкерлермен бірге күйзеліп, бірге қуанды.

Суреттер: Амангүл Тілейқызы

Актёрлік құрамның шеберлігі де қойылымның сәтті шығуына айрықша ықпал етті. Спектакльде Мосыл саудагері әрі әміршінің рөлін сомдаған актёр Азамат Эсқұлов бұл кейіпкердің тарихтағы нақты тұлғадан алынғанын айтады.

Сурет: Амангүл Тілейқызы

Мен сомдаған образ – Харун-ар-Рашид есімді тарихи тұлғаның негізінде жасалған. Ол VІ-VІІ ғасырларда өмір сүрген, әділеттілігімен аты қалған патша. Қойылымда бұл кейіпкер басында қарапайым адам ретінде көрінеді. Әмірші «Егер бір күн патша болсам...» деп армандаған Әбілқасанға бір күн патша болуға мүмкіндік береді. Осы сәттен бастап оның ішкі өзгерісі, билікпен бетпе-бет келуі басталады, – дейді актёр.

Азамат Эсқұлов өз рөлін сомдауға 3 ай бойы дайындалғанын алға тартты.

Дайындық барысында образға барынша енуге тырыстық. Театрда «рөл толық ашылды» деп айту қиын. Өйткені әрбір көрерменнің қабылдауы арқылы біз де өсеміз. Сондықтан әлі де қосарымыз көп, – дейді ол.

Аталған қойылымда Әбілқасанның жары Зухраның рөлін сомдаған актриса Айым Жүсіпбекова бұл туындыны өзінің шығармашылық жолындағы ерекше белес деп бағалайды.

Сурет: Амангүл Тілейқызы

Жастар театрында 15 жылдан астам уақыт жұмыс істеп келемін. Осыған дейін көбіне батыл, бұзық қыздардың бейнесін сомдап жүрдім. Ал бұл жолы мен үшін мүлде бөлек рөл бұйырды. Зухра – аңқау, аңғал, бірақ мінезі жұмсақ, ішкі даналығы бар әйел. Осы кейіпкер арқылы мен әйел затының еріне деген құрметін, махаббатын, сенім мен қолдаудың маңызын жеткізуге тырыстым. Бұл – махаббаттың, төзім мен түсіністіктің символы, – деді актриса.

Айым Жүсіпбекова бұл образды алып шығу үшін тынымсыз еңбек етіп, кейіпкерін тереңінен зерттеген.

Бұл спектакльдің басты ерекшелігі – оның біздің ұлттың болмысына етене жақын, қазақы нақышта сахналануы. Мұндағы оқиға Мысыр елінде өрбігенімен, кейіпкерлердің әрекеті, сезімі, көзқарасы – бәрі өз халқымызға таныс. Сондықтан көрермен сахнада шынайы өмірді көргендей күй кешеді, – деп сөзін қорытындылады Айым Жүсіпбекова.

Сурет: Амангүл Тілейқызы

Айта кетейік, бұған дейін елорда театрында «Әлия» спектаклінің салтанатты түрде сахналанғаны жайлы жазған едік.