Шығыс Қазақстандағы Марқакөл ауданының тұрғындары ауылға кіреберіс жолдың қираған күйіне шағымданды. Әлеуметтік желіде тараған бейнежазбада көліктердің шұңқыр мен батпақ арасынан әрең өткен сәттері көрсетілген, деп хабарлайды Skifnews.kz ақпарат порталы.

«Шекара аудандарын дамытамыз дейді, бірақ осындай жолмен қалай дамиды?»

Кей пікір қалдырушылар Алматы мен облыс орталықтарының жолына миллиардтар бөлінгенімен, шалғай ауылдар ұмыт қалғанын айтып, билікке наразылық білдірді.

Ал аудан әкімдігі бұл мәселеден хабардар екенін айтып, жауап қалдырған:

«Қазақтан ауылының кіреберіс жолын күрделі жөндеу жұмыстары 2026 жылға арналған даму жоспарына енгізілген. Сонымен қатар, ауылды сапалы интернетпен қамту да жоспарланып отыр», – деп мәлімдеді Марқакөл ауданының әкімдігі.

Дегенмен, жергілікті тұрғындар «тағы екі жыл күту тым ұзақ» деп санайды.

Шекаралық аймақтардағы инфрақұрылым мәселесі жылдар бойы шешілмей келе жатқан түйткілдің бірі. Марқакөл жолы — соның айқын көрінісі. Халық «даму жоспары» емес, нақты әрекет күтеді.