Таңғы 08:00-ден кіріп, міне, кеш бата шығып бара жатырмыз. Қасым-Жомарт Тоқаевтың Нью-Йоркке сапарының алғашқы күні қалай өткенін жол жөнекей айтып берейін. Келелі кездесулер көп болды. Тілші ретінде байқағаным, еліміздің болашағына, алдағы буынның мықты дайындығына көп көңіл бөлінді.

Амит Севак, Educational Testing Service компаниясының президенті:

- Әр елдің өзіне тән қажеттіліктері болатындықтан Қазақстанға керек дүниелерді зерттеп, саралап, елдің экономикасының дамуына, адами капиталының ілгерілеуіне үлес қосқымыз келеді. Біздің компания мұндайда жасанды интеллекті тиімді қолданудың жолдарын жақсы біледі. Алда осы бағытта арнайы жоспарымызды ұсынбақпыз.

Ердана Ержанұлы, тілші:

- Севак мырза 21-ғасырда «өнер-ғылым бар жұрттар» математика мен оқу қабілетінен бөлек шығармашылық, коммуникация, бірлесе жұмыс істей алу дағдыларын дамытқысы келетінін алға тартты. Ынтымақтастықтың маңызын Ғылым және Жоғары білім министрі Саясат Нұрбек те ерекше атап өтті. Америкалық әріптестермен шай үстінде біраз мәселе талқыланып, әр шыныаяқпен шешімдер де табыла кеткендей көрінді.

Саясат Нұрбек, ҚР Ғылым және жоғары білім министрі:

- GRE, SAT, TOEFL тәрізді ең атақты тестерді пысықтаған ғылыми орта. Қазіргі таңда біздің бірыңғай ұлттық тестілеудің сапасын күрт өзгерту, мазмұнын толыққанды қарастыру – осы ең ірі тестологиялық ғылыми орталығымен жұмыс артқарылатын болады. Келесі айда үлкен зерттеушілер делегациясы келеді.

Ердана Ержанұлы, тілші:

- Бұл ҰБТ ауысады деген сөз емес. ҰБТ-ның сапасы жақсарады деген сөз. Сонымен қатар Президент алдына жүз жылдық тарихы бар Смитсон институты мамандары да келді. Адамзат өркениетінің неше түрлі жауһар жәдігерлерін жинақтаған орталық Қазақ мәдениетін де кеңінен дәріптеуді еселей түссек дейді. Оған деген қызығушылықтың зор екенін елші Ержан Ашықбаевты мұқият тыңдап тұрған мамандардың жүзінен де, Смитсон делегациясынан бастап келген Халле Батвиннің сырғасынан да байқадық.

Халле Батвин, Смитсон орталығының халық шығармашылығы және мәдени мұра арнайы жобалары жөніндегі директоры:

- Оларды сондай жақсы көремін. Өте әдемі сырға. Жалпы қазақ қолөнеріне тәнтімін. Бұйымдардың нобайы, өрнектеріндегі әр алуан сыр мызғымас дәстүрмен тамаша сабақтасқан. Мен үшін сондай ерекше болып көрінеді.

Ердана Ержанұлы, тілші:

- Алда Халле ханымның да, америкалық өнерсүйер қауымның да қуанышы арта түспек. Төл мәдениетіміз АҚШ астанасынан бастап кеңінен дәріптел. Оған қоса енді тарих, мәдениет бағыттарындағы қазақстандық ғалымдар келесі жылдан бастап Смитсон институты нысандарында тағылымдамадан өте алады. Кешенді зерттеу жасай алады. Иә, бір директор қазақша сырға тақса, тағы бір басшы көк байрағымызды кеудесіне тағып келіп, көзге түсті. Джаред Коен Қасым-Жомарт Тоқаевпен кездескен соң, Жаслан Мәдиевпен ұзақ отырып шай де ішті. Іскерлік әңгіменің қыр-сырын кейін министрдің өзі айтып берді.

Жаслан Мәдиев, ҚР цифрлық даму, инновациялар және аэроғарыш өнеркәсібі министрі:

- Біз де олармен қазір бірнеше жобаны талқылап жатырмыз. Мысалы, үлкен цифрлық инфрақұрылымдар, деректерді өңдеу орталықтарын құру, тағы да басқа жасанды интеллект құралдарын, құру жағынан жасанды интеллект агенттіктерін құруға осындай жобаларды талқылап жатырмыз.

Түгелдей цифрлық елге айналып, жасанды интеллектің жұмысын арнайы министрлік арқылы жүйелегісі келетін Қазақстанға Голдман Сакстай алпауыт серіктес қажет ақ. Ыңғайлы инвестициялық климаты қалыптасқан, цифрландыруда алдыңғы қатарға шыққан біздің ел де бұл банк үшін де айрықша мүмкіндік болып отыр. Бүгінгі жиынға уран саласындағы канадалық серіктесіміз де қатысты. Қазақстанға 500 млн доллардан астам инвестиция құйған Cameco бірлескен жобалардың болашақ жоспарынан хабар берді. Бұл тек басы ғана. Ендігі ақпар алдағы екі күннің еншісінде.

Авторлары: Ердана Ержанұлы, Эндрю Фанг