Ұлытау облысында кәріз жүйелерінің 70%-тен астамы тозған, деп хабарлайды 24KZ. Жарты ғасыр бұрын салынған құбырлар биыл біренеше рет жарылды. Әсіресе шағын қалалар мен кенттерде мәселе өзекті. Алдағы бес жыл ішінде кезең-кезеңімен ауқымды жаңғырту жұмыстары жоспарланған. Осыған байланысты өңірде төрт жоба жүзеге асырылып жатыр.
Шағын қалаларды былай қойғанда, облыс орталығының өзі жетісіп тұрған жоқ. Жезқазғанда 5-ші шағынаудандағы тозған құбыр бірнеше рет жарылып, айналаны қолқаны қабатын иіс басады. «Әсіресе жазда қиын», – дейді тұрғындар. Көптің тілегі биыл орындалмақ. Мұнда жаңа кәріз желісі тартылып жатыр.
Дархан Желібаев, Жезқазған қаласының тұрғыны:
- Бұрын, иә, иіс болатын. Жағымсыз канализацияның иісі. Енді бұл, шынын айту керек, жаңа жүйеге әлі қосқан жоқ. Енді қосып жатыр. Қосқаннан кейін көре жатамыз.
Жаңа желінің ұзындығы жеті шақырымға жуық. Оған осы аумақтағы 30-ға жуық көпқабатты үй қосылады. Жаңғырту жұмыстары сәуір айында басталған.
Нұржан Тәжікеев, мердігер ұйым өкілі:
- Біздің Жезқазған тас. Қиындықтар болып жатыр. Шамамен жұмысты магистраль бойынша 2,2 километр қаздық. Барлығы өзі берілгені 7 километр. Бүкіл 5-ші ықшамауданы. Жоспар бойынша қазанға шейін берілген. Алла қаласа, ертерек бітіреміз. Жұмыстың қарқыны жақсы.
Жалпы облыс бойынша кәріз желілерінің ұзындығы 540 шақырым болады. Оның 71%-і тозған. Бұл көрсеткішті төмендету мақсатында бірқатар маңызды жоба қолға алынды. Жаңғырту жұмыстары бірқатар елді мекенде қатар жүріп жатыр. Жыл соңына дейін 100 шақырымнан астам құбыр ауыстырылады.
Балтабек Қадыров, Энергетика және ТҮКШ басқармасының бас маманы:
- Сәтбаев қаласындағы №8 шағынауданнан Сәтбаев қаласының кәріздік тазарту құрылыстарына дейін кәзір желілерін салу, Қаражал және Жәйрем кентіндегі кәріз желілерін жаңғырту жобасы болып табылады. Бұл жобалар аясында 107 шақырым желілер жаңғыртылады. Жалпы алғанда бұл жобалар өңіріміздегі кәріз инфрақұрылымын жаңғыртып, халықтың санитарлық-экологиялық жағдайын айтарлықтай жақсартуға үлес қосады.
Облыстағы кәріз суларын тазарту кешендері де біртіндеп қайта жаңартылады. Жезқазған мен Сәтбаевтағы құрылғыларды бойынша дайындалған жоба мемлекеттік сараптамадан өтті. Бұдан бөлек, облыс орталығындағы Қостанкелді, Бекболатсай және Қабанбай батыр шағын аудандарында су бұру жүйесін жаңғыртуға бойынша сметалық құжат әзірленіп жатыр.
Авторлары: Елдос Кәкенов, Нұрдәулет Аманкешов
