Үш айда 3 мыңға жуық науқасқа көмек көрсетілді. Бұл – елордадағы Ұлттық шұғыл медицина орталығының мамандары жеткен жетістік.

Себебі бұған дейін санитарлық авиация аталып келген мекеменің енді өз клиникасы бар. Аты айтып тұрғандай, мұнда көбіне хәл үстіндегі және дәрігерлердің шұғыл көмегіне мұқтаж жандар түседі. Оларға дереу әрі сапалы қызмет көрсету үшін орталық озық үлгідегі аппараттармен жабдықталған. Қазіргі таңда толық қуатта жұмыс істеп жатыр. Ал бүгін мұнда қуаныш. Аурухана қабырғасында алғашқы сәбидің кіндігі кесілді.

Еркебұлан Тұраров, қала тұрғыны:

- Бүгін осы бөлімшеде біздің қызымыз дүниеге келіп жатыр Ризамыз. Бәрі жақсы, палаталар, құрал-жабдықтар жаңа. Дәрігерлер де өте білікті мамандар, кешеден бері жақсы қызмет көрсетіп жатыр. Әйеліміз екеуміз осылай бірінші болып түсіп қалдық.

Айта кету керек, орталық тек шұғыл жағдайда емес, азаматтарға міндетті әлеуметтік медициналық сақтандыру негізінде кепілдендірілген көмек бере алады. Бас-аяғы 250 төсек-орын қарастырылған. Жалпы хирургия, кардиология, комбустиология сынды 9 бағыт бойынша ем-дом жасалады. Сондай-ақ ағза тасымалдау, денсаулығына байланысты елге қайта алмай қалған отандастарымызға қол ұшын созу да осы Ұлттық орталық мамандарына жүктелген.

Ержан Әділбеков, Ұлттық шұғыл медицинаны үйлестіру орталығының төрағасы:

- Акушерлік, гинекология, политравма, урология бар. Барлық аймақтағы, керек болса санавиациямен апатқа түскен, мәселен Петропавлдағы жарылыстан екі науқасты алып келдік. Содан кейін жүкті әйелдерді алып келеміз Енді балаларға арналған корпусты салсақ, келесі жылдан бастап оларды да алып келеміз.