2025 жылы Алматыда экономикалық өсім қарқыны жоғарылап, инвестициялық белсенділік артты. Бұл туралы қала әкімі Дархан Сатыбалды Алматының экономикалық даму қорытындыларына арналған брифингте мәлімдеді.

Өсімнің негізгі драйверлері – құрылыс пен көлік саласы және өңдеу өнеркәсібі. 2025 жылдың 11 айында қалаға негізгі капиталға шамамен 1,9 триллион теңге инвестиция тартылды. «Бұл өткен жылдың осы кезеңімен салыстырғанда 19 пайызға көп», — деді әкім. Биыл Алматыда жалпы құны шамамен 500 миллиард теңгені құрайтын 12 ірі инвестициялық жоба іске қосылды. Олардың қатарында жеңіл автокөліктер шығаратын мультибрендті зауыт, автомобиль шиналарын қайта өңдеу және шыны ыдыс өндіру кәсіпорындары, сондай-ақ күн модульдерін өндіру жобалары бар.

Дархан Сатыбалды, Алматы қаласының әкімі:

- Жыл қорытындысы бойынша, Алматы қаласының жалпы өңірлік өнімінің өсімі 6,4% деңгейінде болмақ. Экономиканың дамуы салық түсімдерінің тұрақты артуымен қатар жүруде. 2025 жылы 11 айда жергілікті бюджетке 1 трлн 970 млрд теңге түсті. Бұл көрсеткіш өткен жылдың осы кезеңімен салыстырғанда 19,4%-ға жоғары.