2026 жылы Маралды ауылдық округін дамытуға 600 миллион теңге бөлінеді. Бұл туралы Шығыс Қазақстан облысының әкімі Нұрымбет Сақтағановтың Маралды ауылының тұрғындарымен кездесуінде айтылды.

Аймақ басшысының айтуынша, 2025 жылы алтын өндіруші компаниямен меморандум аясында округтің дамуына 400 млн теңге бөлініп, осы қаржыға Қыстау–Күршімдегі орталық көше жөнделді және Маралдыдағы соғыс ардагерлері аллеясына гранит тақтайша төселді.

Starlink спутниктік интернеті орнатылып, орталық саябақтың қоршауы жаңартылды. Ауыл стадионы спорттық құрал-жабдықтармен толықтырылды. Үшбұлақ және Қыстау–Күршім ауылдарында шағын футбол алаңдары, жас мамандар үшін тұрғын үйлер салынды.

Келер жылы округтің дамуына 600 миллион теңге бөлінеді.

Облыс әкімі Маралдының тарихи маңызына тоқталып, ауылдың болашағына сенім білдірді.

"Маралды – ата-бабамыздың ізі қалған, маңдай термен көркейген, бізге аманат болып жеткен қасиетті мекен. Бүгін біз Жаңа Маралды туралы айтып отырмыз", – деді Нұрымбет Сақтағанов.

ШҚО әкімдігі ұсынған материал