Тәуелсіздік күні қарсаңында Тараз қаласында ардагерлерге арналған "Белсенді ұзақ өмір орталығы" салтанатты түрде ашылды. Бұл орталық – зейнеткерлердің уақытын тиімді өткізіп, салауатты өмір салтын ұстануына, шығармашылықпен айналысуына мүмкіндік беретін маңызды жоба, деп хабарлайды Тараз қаласының әкімдігі.

Ашылу салтанатында облыс әкімі Ербол Қарашөкеев жиналғандарды құттықтап, орталықтың жұмысына сәттілік тіледі.

"Бұл орталық – қарттарымыздың сапалы өмір сүруіне қолайлы жағдай жасап, белсенді әрі мазмұнды қариялық өмірді қамтамасыз етуге бағытталған маңызды әлеуметтік жобалардың бірі. Қазіргі таңда облысымызда 142 мыңнан аса зейнеткер бар. Оның 57 мыңнан астамы Тараз қаласында тұрады. Бүгінде орталыққа 2 мыңға жуық зейнеткер қабылданып, түрлі бағытта қызметтерді пайдалануда. Бұл орталықтың қоғам үшін маңызы, аға буынға көрсетіліп отырған қамқорлықтың айқын дәлелі болып отыр.

Нысанның бой көтеруіне қолдау көрсеткен "Самұрық-Қазына" қорының ісі ерекше үлгі боларлықтай. Қоғамның дамуына және әлеуметтік бастамаларға бағытталған мұндай қамқорлық – еліміздің бірлігі мен өзара ынтымағының жарқын көрінісі. Осы демеуі үшін қор басшылығы мен барлық қызметкерлеріне алғысымызды білдіреміз", – деді аймақ басшысы.

Келесі кезекте "Самұрық-Қазына" АҚ Адам ресурстарын басқару департаменті басшысының міндетін атқарушы, Протокол қызметінің басшысы Нариман Мелдебек сөз алды.

Жалпы мұндай жұмыстарды еліміздің басқа өңірлерінде де жүргізу жоспарланып отыр. Биыл "Самұрық-Қазына" қорынан әлеуметтік қолдау алған азаматтардың саны 1 миллионға жетті. Бірыңғай қайырымдылық операторы арқылы осы мақсаттарға 8 миллиард теңгеден астам қаражат бағытталып отыр. Оның ішінде Жамбыл облысында қордың қолдауымен 4 оңалту орталығы мен 1 спорт кешені жұмыс істеп тұр. Соңғы 5 жыл ішінде құры 1,7 миллиард теңге болатын 17 қайырымдылық жобасы іске асырылған.

Осы ретте бұл орталықтың ашылуына "Жамбыл Даму қоры" мен жергілікті кәсіпкерлер атсалысқанын айрықша атап өткен абзал.

Сонымен қатар жиында құттықтау сөзін сөйлеген облыстық Ардагерлер кеңесінің төрағасы Еркінбек Солтыбаев қарттарға көрсеткен құрметтері үшін облыс басшылығы мен "Самұрық-Қазына" қорына ағалық алғысын жеткізді. Келесі кезекте ғимараттың салтанатты лентасы қиылып, меймандар жаңа нысанды аралап, жұмысымен танысты.

Аталған орталық 200 орынға арналған. Мұнда әлеуметтік сауықтыру, медициналық, психологиялық, педагогикалық, мәдени, еңбек және тұрмыстық – бас-аяғы 7 негізгі бағыт бойынша жұмыс жүргізіледі. Сонымен қатар аға буын өкілдеріне арналған 26 түрлі қызмет көрсетіледі. Атап айтқанда, емдік дене жаттығулары, йога, скандинавиялық жүріс, қолөнер, би, шахмат пен тоғызқұмалақ, тіл үйрену, цифрлық сауаттылық, психологиялық қолдау сынды бағыттар қамтылған. Жаңа орталықта зейнеткерлердің бос уақытын тиімді ұйымдастырумен қатар олардың қоғам өміріне белсенді араласуына барлық жағдай жасалған.

Мәтіннен қате тапсаңыз, бізге жазыңыз