Қостанай облысының Рудный қаласында Республика күніне арналған салтанатты іс-шара өтті. Мерекелік жиында Мемлекеттік ту ресми түрде көтеріліп, тұрғындар мен қала қонақтары еліміздің басты рәмізіне құрмет көрсетті. Сондай-ақ қала орталығында ашық аспан астында концерт ұйымдастырылып, жергілікті өнерпаздар мен шығармашылық ұжымдар өнер көрсетті. Бұдан бөлек жаңа дене шынықтыру-сауықтыру кешенінде түрлі спорттық жарыстар өтті.

Рудный қаласының орталық алаңында Республика күніне орай салтанатты түрде Мемлекеттік Ту көтеру рәсіміне жүздеген қала тұрғыны қатысты.

Рудный облыстың өнеркәсіптік орталығы болып саналады. Мұнда темір кенін өндіретін және байытатын ірі қазақстандық кәсіпорын жұмыс істейді. Таяу жылдары қалада ыстық брикеттелген темір өндіретін зауыт салынады.

Құмар Ақсақалов, Қостанай облысының әкімі:

- Бүгін біз көк туымызды көтеріп, әнұранымызды шырқай отырып, Ұлы жолдың маңызын тағы да терең сезінеміз. Мемлекеттік рәміздеріміз елдік пен бірліктің, тәуелсіздік пен тұтастықтың символы. Құрметті ағайын, біздің міндетіміз – ата-баба аманатына адал болу, Тәуелсіздіктің туын биік ұстап, жасампаздық жолында Қазақстанның жарқын болашағын бірге қалыптастыру. Республика күні құтты болсын!

Рудный қаласында әлеуметтік инфрақұрылым да қарқынды салынып жатыр. Соңғы бірнеше жылда мұнда елуден астам нысан пайдалануға берілді. Олардың ішінде балабақшалар, мектептер, ауруханалар, спорт кешендері мен көпқабатты үйлер бар.

Ләззат Өтемұратова, тілдерді оқыту орталығының маманы:

- Бүгінгі мерекеміз, Республика күні Рудный қаласында кең көлемде аталып өтіп жатыр. «Арыстандай айбатты, жолбарыстай қайратты, қырандай күшті қанатты мен жастарға сенемін» деп Мағжан Жұмабаев айтқандай, міне, Қазақстанның болашағы жастардың қолында. Осы сәтті пайдаланып барша қазақстандықтарды айтулы мерекемен құттықтағым келеді.

Ұлттық мерекеге орай, Рудный қаласында ашық аспан астында үлкен концерт ұйымдастырылды. Қала тұрғындары мен спорт сүйер қауым жаңадан салынған дене шынықтыру-сауықтыру кешеніндегі түрлі шараларға куә болды. Жаңа нысан заманауи талаптарға сай салынған. Мұнда бір мезгілде мыңға жуық адам спортпен айналыса алады.

Авторлары: Серік-Ибраһим Орынбек, Ермек Мұхамедьяров