АҚШ-та ірі көлемде кокаин тасымалдау ісі бойынша қазақстандық болуы мүмкін екі адам ұсталды, — деп хабарлайды Massaget.kz тілшісі.

Техас штатының Чемберс округі шерифі кеңсесінің мәліметінше, 27 қыркүйекте арнайы тергеу бөлімі I-10-тасжолдағы көлікті тексеру кезінде 35 келі кокаин тапқан. Есірткі көлікке мұқият жасырылған.

Көлік жүргізушісі — Нұрсұлтан Мұқтарәлі, ал жолаушы — Мұхит Дәнібеков. Оларға аса ірі көлемде есірткі сақтады деген айып тағылған. Екеуі де Чемберс округінің түрмесіне қамалғаны айтылады.

Мұхиттың ағасы Жомарт Дәнібеков олар кінәсіз екенін айтып, мәлімдеме жасады. Оның айтуынша, Мұхит пен әріптесі Нұрсұлтан — көлік тасымалдаумен айналысатын жүргізушілер. Олар өздері тасымалдап келе жатқан көлікте есірткі барын білмеген.

Қазір олардың отбасылары 200 мың доллар кепіл ақысын және адвокат қызметін төлеу үшін қаражат жинап жатыр.

"Олар АҚШ-қа адал еңбек етуге келді, біреудің қылмысы үшін жапа шекпеуі керек. Бауырымның үш кішкентай қызы бар, жұбайы ауыр науқас", — деді Жомарт Дәнібеков.

Instagram парақшамызға жазылып, ең қызықты ақпараттарды бірінші болып оқыңыз!