Жыл сайын өзге мезгілдерге қарағанда күзде баспана бағасы өседі. Өйткені дәл осы кезеңде жылжымайтын мүлікке сұраныс күрт артады. Риэлторлардың пікірі осындай. Жалпы нарықта тұрғындар көбіне екі бөлмелі пәтер алуға тырысады. Мұның сыры неде?

Нарықта үй көп. Таңдап жүріп аласыз. Тек қалтаңыз көтерсе болғаны. Риэлторлардың айтуынша, өтімдісі — екі бөлмелі пәтер.

Ерболат Мыңғышпан, сарапшы:

- Өйткені бір бөлме алғаннан көрі үстіне шамалы қосып жіберсек те екі бөлме алғанымыз тиімді ғой деген сияқты ой келеді азаматтарға. Ал үш бөлмеге ипотекасы ауырлау болып кеткендіктен жағдайы келе бермейді көп халықтың. Сондықтан көбінесе екі бөлме. Ал енді тіптен жағдайы келмей жатқан азаматтар бір бөлмені қанағат тұтуға мәжбүр болады

Жалпы Ұлттық статистика бюросының мәліметі бойынша, биыл маусым-шілде айларында елде сату және сатып алу туралы 33 мыңнан 39 мыңға дейін мәміле жасалса, тамыз-қыркүйек айларында 41 мыңнан астам құжат рәсімделген. Бұл күзде сұраныстың артып, қыста төмендейтінін көрсетеді. Сол себепті баға да құбылып тұрады.

Әлібек Сыздыков, риэлтор:

- Желтоқсаннан наурыз айының ортасына дейін бағалар түсе бастайды. Наурыздан бастап, жаздың алдына дейін өсе бастайды. Сосын жазда каникулдар болады. Адамдардың бәрі демалады. Шетелге кетеді. Жаз мезгілінде онша көп сатылым болмайды. Күзден бастап, қыркүйек айынан қараша айына дейін бағалар көтеріліп, нарық ұзарады.

Баспана саудасы қызып тұрғанмен қолма-қол ақшаға сатып алушылар саусақпен санарлық. Көбі ипотекалық несие рәсімдейді. Сарапшылардың айтуынша, тұтынушылардың басым бөлігі кемінде 10-20 пайыздық бастапқы жарна төлейді. Қазіргі уақытта үй саудасы бойынша Астана, Алматы қалалары мен Қарағанды облысы көш бастап тұр.