Ақтау жағажайында екі қайық соқтығысып, 11 жастағы бала зардап шекті, деп хабарлайды 24kz.

Дәрігерлер оның басындағы жарақатын танғаннан кейін үйіне жіберген. Қазір жеткіншек амбулаторлық ем қабылдап жатыр. Оқиғаны қайықтың бірінде отырған жолаушы түсіріп алған. Көліктік бақылау инспекциясы шағын көлемді су көлігін басқару ережесін өрескел бұзғандарды анықтап, әкімшілік шара қолданды. Бұған дейін қоғам белсенділері пирс аумағында яхта, қайықтарды қолдану кезінде қауіпсіздік ережелерінің сақталмауына шағымданып, кәсіпкерлер палатасына жүгінген. Құзырлы органдардың қатысуымен бірнеше рет жиын өтсе де, ешқандай нәтиже болмапты.

Марс Бегежанов, облыстық көліктік бақылау инспекциясының бас маманы:

- Ееме иесіне Әкімшілік құқықбұзушылық туралы кодексінің 582-бабының 2-ші және 4-ші тармақтары бойынша 30 айлық есептік көрсеткіш мөлшерінде айыппұл салынды. Екінші кеме «Man 0104» иесі анықталып, тиісті шара қабылдау үшін инспекцияға шақыртылды.

Сергей Ворожейкин, өңірлік сауда және туризм салалық кеңесінің төрағасы:

- Пирс аумағында шағын көлемді су көліктерінің қозғалысына құзырлы органдар тарапынан бақылау жүргізілмей келеді. Бұл өмірге қауіпті әрі өңірде су туризмін дамытуға кері әсер етеді. Су көліктерін тіркеу, олардың заң аясында жұмыс істеуін тұрақты түрде қадағалау қажет. Өз кезегінде, қайғылы оқиғаның да алдын алатыны сөзсіз.